Showing posts with label comedy. Show all posts
Showing posts with label comedy. Show all posts

Wednesday, September 12, 2007

بمناسبة رمضان ..... وكل سنة وانت طيب

كل حاجة دلوقتي بمناسبة رمضان بتحصل م هو "موسم" بقى وكل سنة وانتوا طيبين,
كثرت تلك الجملة "كل سنة وانت طيب" ... كل ما يحدث يتستر وراءها.
* 300 مليون جنيه تكلفة تقريبية لإنتاج 38 مسلسل في رمضان
يعني لو الواحد اتفرج على مسلسل كامل كل يوم مش هيلحق يخلصهم حتى بعد العيد , لأ وإيه بيقفلوا السنيما في رمضان !!
* الياميش بقى (جوز الهند من فيتنام - والزبيب من إيران )
يعني فيتنام بعد م اتهرست من أمريكا جاية تنمي اقتصادها على قفانا إحنا بقى وصلت لجوز الهند أنا أصلاً مش باكله في رمضان ولا غيره
وإيران بتبعت العنب في الطريق عقبال م يوصل يبقى زبيب مثلاً ولا إحنا كل العنب بتاعنا ضايع على الخمرة ولا إيه؟
يلا إشمعنى هم م الصين واخدانا مقاولة في الحاجات الصغيرة كلها حتى الفوانيس اللي كل سنة بنجيبها رغم إن فيه في البيت من السنة اللي قبلها.
* الحفلات والخيمات الرمضانية و التي تنوب عن الكباريهات والملاهي الليلية اللي بنقول عليها "ديسكون" قصدي "ديسكو"
م هي دي كمان فيها بلاوي لأ وإيه علشان الشهر الكريم و"كل سنة وانت طيب" المغنيين زودوا أجورهم في الحفلات
(هيفا جداً - وتامر اللي منزل شريط ديني- نانسي عجرم - حتى محمد نور اللي لسة بيقول أنا أهو)
كلهم زودوا أجورهم بمناسبة كرم رمضان.
طب فيه سؤال كدة من غير إحراج : فين رمضان من كل ده؟

Tuesday, September 11, 2007

كدة رضا ... أحمد حلمي يكشف جانب جديد من شخصيته

أول فيلم في الموسم أشاهده بعد "قص ولصق" تفاجئت بالقصة المحكمة والأداء الرائع والإخراج الملفت للنظر و الجودة في كل من الديكور والصوت والمؤثرات والصورة وغيره.


السيناريو: أعجبت جداً بالسيناريست الجديد " أحمد فهمي" الذي فاجئني وأدهشني بالسيناريو المدهش وحواره المتقن, وتناسق الأحداث وعمق الشخصيات ودقة رسمها , والحبكات المتعاقبة وتوقيتاتها, وأيضاً النهاية فالقصة جديدة نوعاً ما إلا أن التيمة معروفة .
مما يجعلني أقيم توظيف السيناريو : 8.5/10

الشخصيات: عمق الشخصيات وتنويعها وإحكام الترابط بينها مع وجود عنصر الشر المتضمن الأبطال ذاتهم أي أنه شر ذاتي و كل شخصية واضحة المعالم بشكل جيد حتى في شخصية سمسم الغير محددة لنفسه ولكنها ضمن الحبكة.
تقييم الشخصيات: 7.5/10
الإخراج: مع أنني لا أحب "أحمد جلال" وأميل إلى "وائل إحسان" لكن أحمد جلال قد أضفى روح الفيلم التي تتطلبها الأحداث بطريقة ملموسة ومنطقية وتوظيف المونتاج والموسيقى التصويرية واللي تشبه موسيقى "ظرف طارق" كما أحسست ولكنها مقبولة.
تقييم الإخراج : 7/10
أكتفى بهذا القدر من نقد عادي الذي أعتبره إتاحة فرصة للجميع لمشاهدة الفيلم ولنا عودة بعد إنقضاء موسمه لأتناوله بالنقد الموضوعي أكثر, وتحليل كل جزيئات بعد رؤيتي له جيداً.
تقيمي العام للفيلم حالياً : 8/10
طبعاً لا أحاول لعب دور الناقد أيضاً ولكنها مجرد محاولة للتعبير عما أحسسته من وجهة نظري المتواضعة .

Tuesday, September 4, 2007

you know مؤتمر الشباب ..... والسيدة الأولي .... و

إمبارح وأنا بتفرج على قناة "OTV" لقيت إعادة المؤتمر الدولي للشباب اللي انعقد في شرم الشيخ كانوا بيغنوا وبيرقصوا وكانت حفلة و "هيصة" و"ماما سوزي" سابقاً و"السيدة الأولى" حالياً بعدما تولت بعض أعمال الرئاسة لما يقال من شائعات عن أن الرئيس تخطى مرحلة الموت و "يحاسب الآن" وابنها كبر أهو "ما شاء الله" وقرب "يحكم البلد" وكانت وبتسقف بس الصراحة مرقصتش "بحكم السن" طبعاً.
كانت بتتكلم إنجليزي اللغة المتعارف عليها هناك علشان إخواننا الأجانب يفهموا وإخواننا العرب "ميفهموش" فلما سمعتها بتتكلم عن إن الشباب بدل م بيتكلموا كلام مش مفهوم ومصطلحات جديدة ملهاش لازمة يعملوا حاجة مفيدة ويشتغلوا وكدة (الصراحة عندها حق في جزء كبير لكن الجزء الأكبر إن مفيش شغل أصلاً والبطالة موضة دلوقتي بس فيه ناس تقليدية وبتشتغل) وفي وسط كلامها لقيتها بتقول "you know" أنا استغربت ....
فكرتني بالأجانب نص كلامهم "you know" دلوقتي لما بيتكلموا في أي حتة وكدة حتى اللاتينين اتعلموها وهيا أصلاً مالهاش لازمة في الكلام زي ما أنا عمال أقول "كدة" كتير وزي م إحنا مقضينها "قشطة" وناس تانية بتعبرعن كلمة "إعتراض" بطريقة تانية في وسط الكلام كأنها "فاصلة" كدة ولما حسيت بإنها منخرطة في الكلام وخايفة على الشباب وعاملة فيها "السيدة الأولى" علطول جه في بالي الأفلام الأمريكية اللي بتتكلم عن (إرهابيين ولازم يكونوا عرب و مسلمين خطفوا طيارة الرئيس الأمريكي والسيدة الأولى في خطر وفي آخر الفيلم الرئيس بيسأل عن زوجته يقولوله إطمن أنقذها بطل الفيلم ويكافئه بإنه يجوزه بنته الكبيرة).
قولت ليه الكلام ده مش بيحصل عندنا ؟ وليه مش حاسين إنها فعلاً مهمة بالنسبة لنا؟ وكلها شعارات وكلام صحافة وإعلام وإشاعة تسميتها بـ"ماما سوزي" و"كدة" برضه ..... وهل ممكن يحصل ده ونحس إننا خايفين على الرئيس وأسرته ونحميهم زي م هما المفروض يحمونا ويراعونا مش يجوعونا؟؟؟؟؟؟
هل لو واحد أصلاً شاف "السيدة الأولى" في خطر .... هينقذها؟؟؟؟؟؟؟