Monday, February 18, 2008

إمبارح كان عمري عشرين

السلام عليكم
(كُتب في 17-2-2008)
بداية مش عارف أبدأ منين أصلاً
لكن كل الكلام هينحصر في عنوان البوست تقريباً
أولاً : إمبارح يوم السبت اليوم العالمي لحقوق (الناس اللي الناس التانية مش مدياهم حقهم) كان عيد ميلادي بالظبط في 16-2-1988 يعني أتميت العشرين سنة الحمد لله وبالمناسبة دي أعلنت اليوم ده أجازة "هو كان أجازة خلقة وأنا حتى في الكلية صادفت إنه أجازة" لكن ده على أد م هو المفروض يفرحني فهو حالياً مزعلني جداً لأني كان مفروض أعمل حاجات كتيرة كنت مخططها ومقررها وأنفذ حاجات كتير لكن معرفتش للأسف أو بالأصح معلمتهاش كلها بس مش بمعنى عملت حبة منهم لأ عملت جزء من كل واحدة فيهم وده طبعاً بيخلي الحكاية مش شغالة وعلى أساس كدة يبقى أنا م أنجزتش حاجة أصلاً لكن الفكرة كلها تنحصر في إني مصاب بداء (تداعي الأفكار) "أكيد ليه علاج متخافوش" لكن مش فعال أوي وهو معناه إني كل م أبدأ حاجة م أقدرش أنهيها ساعتها لأي سبب من الأسباب وأبدأ في حاجة تانية جديدة خالص ولما أكمل بكمل في الناحيتين لكن بتطلع حاجة جديدة عنهم جداً وده اللي بيحصل دلوقتي وأنا بكتب البوست المفروض متكونش البداية كدة خالص لأن كل م أكتب كلمة فيه كلمة تانية تيجي في دماغي ... البداية كدة :
14-2 عيد الحب
وسبحان الله كل سنة يجي قبل عيد ميلادي بيومين وهو أصلاً المفروض إنه عيد الحب بتاعنا في مصر اللي عمله على ومصطفى أمين كان في 4-11 وحاجة لوحدها خالص بس طلعوا بقى في حكاية "الفالنتين" بكرة كتابة الانجليزي ده
لكني بكره حكاية فالنتين دي والمصدر بتاع الحكايات عنه أهو:
وعلشان كدة كنت كاتب حاجة من الحاجات اللي بدأتها قريب ودخلت في غيرها:
لست أحبك هذا اليوم
لكنْ أحبك كل يوم
فإنَّ اليوم سينقضي .. لكنَّ حبك لا يزول
الشمس قد تغيب.. والليل قد يطول
ومهما تكررت كلمات وقيلت
(Happy Valentine)
أنا لن أقول ..
وقاربت على العشرين خلاص أهو فاضل يومين هانت ....
وهنا أذكر نزار :
عشرون عاماً يا كتاب الهوى ولم أزل في الصفحة الأولى
وعلى غرارها أقول:
عشرون عاماً قد مضت والقلب لم ينبض هل كان حظي رافضاً أم أنني أرفض؟
16-2-1988
ولدت والحمد لله مش عارف ليه جيت لكن أعلم من أين أتيت ولكني أتيت لماذا؟ هو ده السؤال مشكلتي إني محدد أهدافي وعارف أنا هكون إيه في المستقبل إن شاء الله لكن مش بسعى ليها كويس كما يجب
ده غير إني كنت مقرر من زمان إني لازم أقرر مصيري قبل م أتم 20 سنة وبعد كدة أبدأ المشوار لكن اللي حصل إني لحد تقريباً لما كان عندي 15 سنة كنت عادي جداً زي أي حد في سني " طبعاً كان عقلي أكبر بلا منازع " لكن كنت إنسان طبيعي زي زي غيري ومش بحسب أي حاجة وسايبها كدة ومكانش في بالي فكرة السينما كنت بتفرج على ماتشات القناة التانية الأجنبية وبخرج أنزل وسط البلد وأدخل سينمات ومقضيها صح زي كل الشباب دلوقتي
لحد م فكري إتغير مش فاكر ليه وإزاي وإمتى بالظبط؟؟؟
لقيت نفسي مختلف وبعمل حاجات جديدة مكانش عمرها على قائمتي وجاءت بالفعل:
1- فكري الإنساني زاد جداً وتكونت لدي بعض الأفكار العقلانية التي تأخذ جميع المميزات لكن تترك وسط سلبيات إختيار أحسنها.
2- عقلي الذي تفتح أكثر أو بمعنى أصح "طرشأ أو طرشق" وكبر أوي ومن ساعتها بقيت عقلاني جداً كل حاجة بحسبها وبعمل إحتمالات لكل حاجة حتى للإحتمالات اللي معملتش حسابها.
3- بقيت أكثر نضجاً وتغاضيت عن التفاهات والسطحية والجنون اللي مش في محله يمكن مجنون على الورق لكن في الحقيقة مش بعرف أتجنن براحتي.
4- وقعت أعباء جديدة على عاتقي وبقيت إلى حد ما الرجل الذي سأكونه بعد 10 سنوات "يعني بقيت في التلاتينات من دلوقتي".
5- بقى ليا شخصيتين شخصية الجاد اللي قد المسئولية الجديدة دي وأتعامل مع الناس الكبار كأني كبير لكن الشخصية التانية الشخصية العاشقة للضحك والمرح والهزار والتهريج وكل المصلحات التي تصب في نطاق عدم الجدية (لكن مش متسيب) هزاري نفسه بقى أكثر نضجاً مش تافه وكلام فارغ وخلاص لكن مرح ذكي وده بيبسطني شخصياً رغم إني بقى قليل جداً الحاجات اللي تفرحني دلوقتي
م الآخر علشان محدش يقول عليا (قفل أو معقد) مع اللي بيهرج أنا أسد جامد معاه وروش بس مش تافه ومع الجاد أنا جاد لكن مش قديم بالنسبة للناس اللي بتحب تهزر ومش سطحي بالنسبة للناس الجادة.
17-2-2008
يعني عيد ميلادي كان إمبارح يعني (إمبارح كان عمري عشرين) لكن عشرين سنة فاتوا
يعني نقدر نقول:
عشرون عاماً قد مضت والله أعلم بالبقية إن أتت!
على فكرة أنا كتبت البوست ده في 17-2 بس دخلت الساعة 12 بوظت الدنيا...!
مش من الناس برضه اللي بتحب إحتفال عيد ميلاد وكدة لكن أهو علشان بس ناس طلبت مني وعلشان عجبني عنوان البوست
وفي النهاية معلش لو طولت عليكم وكل سنة وإنتم طيبين

47 comments:

appy said...

كل سنه وانت طيب
وعموما حلو قوى انك تحدد اهدافك من بدرى كده بجهد شويه ربنا هيكرمك وتحقق ذاتك

الأستاذ said...

appy
وإنتي طيبة وربنا يكرمك إنتي كمان

السقا said...

كل سنة وانت طيب وعقبال 200 سنة

HoNdA said...

كل سنة وانت بخير
:)

Che The Hermit said...

قشطااااااااااااااات
تصدق والله العظيم حاسس ان انا اللى بكتب
بجد كل سنة وانت طيب
وعقبال 1256847204138487523645488554 سنة

تشي

My Hope$ said...

سوري جت متاخرة
بجد
كل سنة وانت طيب
وعقبال ميت سنة
من تلات شهور حسيت نفس الشعور بتاعك
اللي هو عشرين سنة يااا مش مصدقة اني دخلت في حقبة العشرين الي اخرة
يارب اللي جاي يبقي احسن
ولو باقي من عمرنا عشرين سنة كمان تكون عشرين سنة صلاح وتقوة وخير ونضوج واستفادة من كل حاجة حولينا
وطول براحتك
انت الاستاذ وعقبال ما نفرح
بميلاد الاستاذ قريب
اول المهنئين ان شاء الله
سلام

The Queen said...

كل سنة وانت طيب يا أستاذ

وعقبال 100 سنة

البوست جميل اوي وكلام من القلب

اكتر حاجه عجبتني انك كنت محدد سن العشرين انك هتبدا منه تحقيق اهداف مخطط لها

يللا عايزين نسمع عنك سمع خير

كل سنة وانت طيب

Heba said...

كل سنة وأنت طيب


ويارب تحقق كل الأهداف اللي حطيتها لنفسك

و القادم....أجمل said...

كل سنة و إنت بصحة و سعادة

البوست مختلف اوووي
فيه كلام و معاني

شيء رائع انك تتغير
بس اوعي تشيل هموم شيء مش موجود
لأني بعمل كده برضوو
و دا بيتعبني ساعات كتيرة

بجد ما شاء الله عليك
أستاذ فعلا
ربنا يوفقك و ييسر لك أمرك
و تحقق كل أحلامك يارب

احترامي و تقديري لك
و للبوست الراااائع و المختلف جدا

:)

EmY said...

كل سنه و انت طيب
انا كمان مولوده يوم 16 و سنة 1988 بس شهر 9
تحياتي

Hosam Yahia حسام يحى said...

كل سنه وانته طيب يا استاذ


وعقبال 300 400 سنه


اتمنى منكم زياره مدونتى المتواضعه وابداء رايكم بها

dina said...

كل سنة و انت طيب..كنت لسا بسمع قريب غنوة منير امبارح كان عمرى عشرين و قلت و النبى لو عمرت لحد العشرين لاعمل بوست كدا...انما انت سبقتنى...عاجبانى فكرة الوقفة مع نفسك دى بعد عقدين من الحياة..و بردو عاجبانى تحليلك لشخصيتك اللى فيه مصداقية و ثقة و يا رب تكون سنة سعيدة عليك كدا و تحقق كل اللى تتمناه و تتكلم فى كل بوست عن موضوع واحد عشان مانتهش منك...هههه
كل سنة و انت طيب

Rania said...

كل سنه و انت طيب
و يا رب السنه الجاية تكون اجمل

تحياتى

سهر said...

كل سنة وانت طيب
متأخرة شوية معلش
تصدق فعلا مشكلة عشرين سنة كتير وياعالم هنعيش زيهم ولا اقل ولا اكتر عشرين سنة خسارة يعدوا واحنا لسه في مكانا
يارب اللي جاي يكون احلى

صحفية روشة said...

هقولك كلمه واحدة
انت (بتتطور) فى كتباتك يعنى
سلام

walaa said...

كل سنه وانت طيب مع انها جات متاخره شويه
بس والله مش اعرف عيد ميلادك
وكويس اللى انت تحدد اهدافك وتعرف اللى انت عايز ايه
تحياتى ولاء

Banota said...

happy birthday ;)

abo salah said...

بعد السلام عليكم

كل سنة وأنت طيب ياباشا

وكل سنة وانت بتتطور وتتطور للاحسن وللانضج ان شاء الله

وكل سنة وانت محقق اهدافك الجميلة وكل اللي نفسك فيه

تحياتي ليك

صالح سعيد said...

السلام عليكم
كل سنه وانت طيب يا استاذ
ايه يا عم الكلام الجامد ده
تقبل تحياتى

mesh2dra said...

السلام عليكم

كل ثانية وانت بخير وف خير
وبتعمل حاجات راضي عنها
وبتحقق احلام
وراضي ربنا
:)

سلاماتي

yomna said...

كل سنة وانت طيب
انا عارفة متاخرة شوية بس اديني لسه عارفة دلوقتي حالا... بس بصراحة انا زعلانة منك... يعني جيت وملاقتش لا تورتة ولا جاتوه ولا حتى تمن التاكسي... ايه عيد الميلاد ده.. مفيش رشة حاجة ساقعة على الزباين ولا ايه

المهم...مبروك على دخولك نادي العشرينات...نحن السابقون وانتم اللحقون...هييييييييييييه دنيا... كلنا لها ... ومنجلكوش في حاجة وحشة...
اما بقى موضوع انك معملتش حاجة كنت مخططلها فده الطبيعي يابني... بس متقلقش قريب اوى هتحقق كل اللي كنت مخططله... طالما انت حاطه في دماغك هتوصله ان شاء الله... ومش لازم 20 يعني انا وصلت بعد ال 21 واديني طبيعية اهو مجراليش حاجة

مرة تانية كل سنة و انت طيب ... وكلنا لها

oceaneyes said...

كل سنة وانت طيب

معلش جاية متأخر ..بس ظروف والله

وعجبنى جدا انك بتحدد اهدافك ..المهم انك تسعى ليها وتعرف البداية فين


تحياتى

:)

الأستاذ said...

شكراً جزيلاً لكل اللي جه يهني ويبارك وكل سنة والجميع بألف خير وعقبال م أجيلكوا ف أفراحكوا إن شاء الله معلش أنا معملتش ولا حتى حفلة إن شاء الله على الضيق لكن لضيق الوقت مش أكتر يادوب طلب مني إني أعمل بوست
وشكراً جداً على جمال روحكم
تحياتي للجميع

الأستاذ said...

السقا
وإنت طيب وربنا يخليك عقبالك

honda
وحضرتك بخير

che the hermit
والله طب كويس .. بس خليك فاكر أنا سبقتك في البوست ده.. وإنت طيب

my hope$
ربنا يخليكي ويارب تعدي الحقبة دي على خير .. وإنتي طيبة

the queen
شكراً من بعض ما عندكم

heba
يارب

والقادم .. أجمل
طب كويس إني عملت شئ مختلف استرعى إهتمام حد أخيراً وربنا يستر في اللي جاي

emy
طب والله شئ لذيذ بس عقبالك برضه كل سنة وإنتي طيبة مقدماً

hosam yahia حسام يحيى
شكراً للزيارة وأرجو تكررها إن شاء الله

الأستاذ said...

dina
يا محاسن الحلو .. قصدي الصدف
شوفتي بقى
بس أنا سبقتك يارب مكونش رخم بس عادي إبقى إعمليه عادي يعني
كل سنة وإنتي طيبة مقدماً

rania
يارب

سهر
فعلاً هي مشكلة أمال أنا متدايق ليه؟
بس خير إن شاء الله

صحفية روشة
شكراً يا سيدتي على النصيحة الغالية والتعليق الأجمل ويارب بس أبقى في المستوى قريب إن شاء الله

walaa
أنا آسف إني مقولتش لكن مش من عادتي إني أسيح يعني وربنا يستر

banota
thnx ya setty

abo salah
ياه يا أخي فينك؟
دعواتك معانا كدة بقى

صالح سعيد
لا يا عم ولا جامد ولا حاجة أنا لسة مبتدئ وخبر .. قصدي بحبو في الكتابة
شكراً ليك

mesh2dra
لا ولا يهمك ويارب يحصل كل ده

yomna
ياه كل المدة دي؟
يعني فكرك مقلقش؟؟
أسيبها على الله؟
يا ملين

oceaneyes
ربنا يخليكي
وعقبالك بقى
شكراً لكلامك الجميل
تحياتي لكِ

تحياتي للجميع بجد وكل سنة وأنتم بخير

dr.Roufy said...

كل سنة وانت طيب سمير
آآآآآآسفة جدا اني اتأخرت كدا
:(
بس دا انت طلعت دلو زيي اهو
أجدع ناس طبعا

كل سنة وانت بألف خير..وبألأف ابداع وفكر
ومن غير تداعي افكار طبعا

الأستاذ said...

dr.roufy
وحضرتك طيبة وعقبالك بس طبعاً مش تتمي العشرين عقبالك في عيد ميلادك الجاي يعني
وبعدين إيه طلعت دلو دي؟
مش تنقي أبراجك قبل م تتكلمي؟؟
ماشي هعديهالك لأننا دلاوي زي بعض مفيش حد أحسن من حد يعني
ربنا يخليكي ويشفيني من تداعي الأفكار
تحياتي

qwert anime said...

مدونة جميلة
و كل سنة و انت طيب مع انها جت متأخر

الأستاذ said...

qwert anime
لأ ولا يهمك وحضرتك طيب
متقطعش الكومنتات بقى
تحياتي لزيارتك

sad_doraa said...

انتا رائع يا استاذ
رائع وبحترم شخصيتك جدا
والعشرين السنة الي جاية هتكون عشرون جديدة
ركز بقة اشئاء كتير هتتغير
اسفة على التأخير في الكومنت

سنووايت said...

كل سنة وانت طيب
فكرتني بعيد ميلادي العشرين واللي كان اسوأ عيد ميلاد في حياتي كنت زعلانة جدا اني دخلت ف ي العشرينات وكنت اول مرة احس ان العمر بيجري واحنا مش حاسيين بس خلاص من ساعتها تعودت علي كدة
جميل اوي انك تحدد اهدافك والاجمل انك والاجمل انك تراجع حققت منها ايه وايه اللي لسة ما حققتوش وان شاء الله السنة الجاية تكون حققت حاجات اكتر بكتير

Nedal said...

جميل :)

أمانى وياسمين said...

السلام عليكم ورحمة الله وبركاته

كل سنة وانت طيب
البوست فكرته حلوة اوي

انا كمان تميت 20 في شهر يناير , ومش عارفة ليه معداش عليا كانه اي عيد ميلاد وخلاص حسيت اني بدخل مرحلة
جديدة في حياتي

لكني للاسف محددتش هدف لسه ومعملتش حاجة او عالاقل معملتش اللي انا كان نفسي اعمله لما يكون عندي 20

الايام جاية كتير مش كده ؟
بوست جميل

yasmeen

Meekness !!! said...

نها ابيض يا ولاد
خلاص كملت 20 سنه يا استاذ
عقبال يا رب 100 سنه


على فكه انت استحاااااااااله 20 بجد



يالله بالتوفيق
و تحياتي للبوست الائع ده .. ما شاء الله بجد على تدويناتك
الف مبروك كمان على النجاح
رفعت راسنا





زيزي

مدونه من اجل الحب said...

كل سنه وانت طيب وعقبال مليون سنه
على فكره انا عجبنى قوى شخصيتك الجاده جدا وقت الجد والمحبه للهزار وروشه وقت التهريج بعيدا عن التفاهه وعن انك تكون قديم
وربنا يوفقك يارب بجد من قلبى

رئيس جمهوريه نفسى said...

كل سنه وانت طيب وعقبال مليون سنه وانت محقق احلامك

الأستاذ said...

sad_doraa
وإنتي طيبة وعقبالك يارب
ربنا يخليكي ويكرم أصلك والله رافعة معنوياتي علطول
ولا يهمك براحتك خالص لسة العشرين فيها كتير إن شاء الله كنتي تعالي في أي وقت

سنووايت
ربنا يكرمك وأشكر زيارة حضرتك جداً وإن شاء الله المرة الجاية يكون أحسن

nedal
شكراً

أماني وياسمين
شكراً يا ياسمين فينك من زمان؟
كل سنة وإنتي طيبة معلش مكنتش أعرف بقى
مفيش جديد عندكوا؟

meekness!!
لأ متقوليش؟
فينك من زمان؟
ربنا يخليكي يارب وألف شكر على كلامك الذوق ده
إزاي مش 20 يعني؟
أقل يعني؟
ولا قصدك 20 ويوم؟

الأستاذ said...

مدونة من أجل الحب
أشكرك جداً جداً على سرعة استجابتك وذوقك العالي ده ويارب يوفقك إن شاء الله
ابقى كرري الزيارة

رئيس جمهورية نفسي
وإنت طيب ياريس

the others said...

كل سنة وانت طيب مع انها متأخرة حبتين تلاته

lonlysmily said...

happy birthday to youuuuuuuuuu
انت دخلت بردة يوم عيد ميلادى وقولتلى سبقتينى وانا هكمل عشرين فى 2 الجاى
وادينى ياسيدى جيت وجبتلك الهديه معايا
وعقبال مليوووووون سنه وتكون فى مرحله احسن واحسن
وتكون لسه بردة مدون محترم وليك ارائك المميزة
تحياتى ليك

الأستاذ said...

the others
لا ولا يهمك خالص
كويس إنها جت أصلاً لأني كنت هتدايق أوي لو مكانتش وصلت
تحياتي وكل سنة وحضرتك طيبة

mnoon said...

لسه ما تجولتش فى المدونه
لكن الموضوع الأخير عاجبنى
وكويس إنك تعرف أهداف وإنت فى السن دا
كتير بيمر عليه عيد ميلاده من غير مايكون عارف لازمتها ايه حياته
وكل اللى بيشغله حيعزم مين فى الحفله؟
وعموماً كل عام وإنت فاهم نفسك ومطور شخصيتك للاحسن دائماً

(green eyes) said...

كل سنه وانت طيب مع انها جت متأخرة ... وعقبال 100 سنه

الأستاذ said...

mnoon
ربنا يخليكي وخدي راحتك خالص وتجولي وفي حناطير علشان هتلفي كتير
أو تاخدي توك توك من عند أول البلوج
وحضرتك طيبة وياريت تكرري الزيارة
سعدت بتعليقك

(green eyes)
وحضرتك طيبة وعقبال 100 سنة برضه

MĕŢø & ŘǿŖêĔ said...

كل عام وانت بخير يا رب
مع انها متأخره كتير
بس العمر كلو يا رب
عقبال 100 سنه


روري

~ شيمى ~ said...

اولا كل سنة وانت طيب
مع انها متاخرة شوية
بس مش مشكلة
ثانيا
مع انى لسه مكملتش العشرين
لكن حاسة ببوادر الاعراض اللى انت بتقولها دى
بوادر النضوج
وعلى فكرة فى اوشاعة بتقول ان البنات بينضجوا وبيعقلوا قبل الولاد
انا بصراحة مصدقاها الحكاية دى
لانى برضة بقى ليا شخصيتين
بس ليه نقول شخصيتين
انا شايفة (مع انى لابسة نضارة)
ان الواحد فى المرحلة دى شخصيته بتتكون
وبتظهر بقى الصفات اللى حتفضل معاك لاخر العمر
وربنا يديك ويدينا طول العمر

الأستاذ said...

MĕŢø & ŘǿŖêĔ
وحضرتك بخير ويارب تكوني كويسة إن شاء الله وربنا يديكي طول العمر إن شاء الله
ياريت تكرري الزيارة

~ شيمى ~
أولاً
ولا يهمك خالص اتأخري براحتك .. سعيد بزيارتك جداً
ثانياً
ربنا يكرمك ويوفقك في النتيجة إن شاء الله وهتعدي صافي
ثالثاً
ربنا يديلك طول العمر إن شاء الله وتعدي العشرين مستريح .. قصدي بمراحل وعقبالك لما تكوني في الموقف اللي أنا فيه ده .. تدبيسة
رابعاً
موضوع نضوج البنات قبل الولاد ده طلع أوشاعة فعلاً.. أينعم في شباب كتير تافهين دلوقتي والله أعلم هل أنا واحد منهم ولا لأ.. لكن ده ميمنعش إن البنت عقلها مهما حصل مش أنضج من الولد لأنه دي ثوابت وكلام مدروس ومعروف
بش مش هنختلف ربنا يسهل إن شاء الله
تحياتشي