Saturday, December 1, 2007

مزاد أنابوليس لبيع فلسطين ... و وعد بوش

في مهزلة قد تكون الأولى من نوعها يشهد العالم وبالأخص العالم العربي بيع فلسطين في أبخس مزاد إشترك فيه رؤساء دول عربية ومازلنا نقف صامتين، ورغم أننا لسنا مكتوفي الأيدي أو مكممين فإننا سمعنا رئيسة الخارجية الإسرائيلية "الست ليفني" تشير إلى أننا "والعياذ بالله" نساعد فلسطين بقولها (مصر تهرب أسلحة إلى غزة) وهذا ما نفاه الرئيس ربنا "يخرسه" قصدي "يحرسه" ..
وليست الفكرة في إننا بنساعدهم بقدر م هي "تهمة" إننا نساعدهم أو إنهم يشوفوا حاجة بتعور غير "الحجارة" ..
أنا عارف إنكوا مش عارفين إن أمريكا بتساعد إسرائيل "عيني عينهم" وكمان من تحت "الأقصى" قصدي "الترابيزة" .. وغير كدة كمان زعيمنا المفدى نفى هذه الإهانة بشدة .. م هو عنده حق ، إزاي نطلع رجالة ونساعد ناس بقالهم أكثر من 50 سنة بيتضربوا من خلق ربنا كلهم وكمان إحنا بنقفل في وشهم معبر رفح!!
وعلى هامش كل ده رايح "أنابوليس" يظيطله شوية ويشوف طلبات عم "أولمرت" لما ياخد حقه خالص يبقى يدي اللي باقي من فلسطين لـ "عباس" بيفكرني إن أحمد مطر كان عنده حس عالي أوي في توقع الإسم ده في قصائد "عباس" بتاعته.
وتكون نتيجة اللقاءات العديدة بينهم وبعد أن تراهم كل يوم في الإعلام وخاصة عندما نرى عباس يأتي في يد أولمرت وكأنه "بيوصله للقاعة أو يمكن عباس رجع متأخر من الإجتماع اللي فات وأولمرت عزم عليه يبات عنده في إسرائيل وبعدها ينزلوا هما الاتنين الصبح مروشين" ...
* يخرج أولمرت من المزاد بضم المزيد من الأراضي الفلسطينية إلى إسرائيل في طريقه إلى الوصول لإسرائيل الكبرى بداية بإمتداد الجدار وتحريفه عن مساره لأبعد من السابق لضم المزيد من المستوطنات التي تبنى حتى هذه اللحظة وحتى عندما كان المزاد قائم في تلك الأيام كان يتم بناء المزيد من المستوطنات وتوسيع الجدار ليس ليشمل المستوطنات الحالية فقط وإنما ليضم المستوطنات الجديدة التي ستبنى "عاجلاً وآجلاً" وهذا ما أستنكره مواطنون مدنيون إسرائيليون أنفسهم وأدانوا تصرفات وسياسة إسرائيل "الصهيونية".
* ويخرج من هذا المزاد والذي لن أسميه مؤتمراً .. السيد عباس وما تبقى له من فلسطين وهم منطقتين :غزة والضفة الغربية
علشان كدة دايماً تلاقيه واخد الحركة بتاعت "عرفات" ودايماً رافع صباعينه السبابة والوسطى لكنهم بعيد عن بعض
متعرفش بقى إيه معناها بالظبط لكن هل يقصد :
- ( لينا الجنة وليهم نار ) مش بعض زي كافل اليتيم يعني ...
- ( فلسطين لواحد مش لاتنين ) زي إعلان twix لكن في نيته حاجة تانية ...
- ( على الأقل خرجنا منهم بحاجتين ) واللي يجي منهم أحسن منهم ...
"وهيبقوا ينصصوا المسجد الأقصى علشان هما يقعدوا يفقروا أدام حائط المبكى " والمسلمين يصلوا جواه ويتقابلوا بعد الصلاة لما اليهود يحاصروهم كما هو معهود كل يوم جمعة.
والعديد من الإسقاطات ويمكن يكون واخدها روشنة وخلاص زي cool وكدة
فكما نعلم أن أمريكا ليست متحيزة لإسرائيل فقد أعطى "بوش" وعده لإسرائيل بالسماح لهم بفعل ما يحلوا لهم من أفعال ضد حقوق الإنسان وحتى حقوق الحيوان لأن الإسرائيليين يشتكون من عنف ووحشية وهمجية الفلسطينين الأشرار!
وأخيراً وبعد كل هذا يأتي موضوع قطع الكهرباء عن قطاع غزة:
الكارثة الإنسانية التي واجهتها غزة لفترة أفسدت عليها طعم الحياة المتبقي في فم الفلسطينيين
ثم الكارثة الأكبر : كارثة معبر رفح
عندما تصد مصر الفلسطينيين ثم نترك لهم أن يتبضعوا من مصر بحجة القلب الحنون والدولة الشقيقة (تلك الدولة التي نفت تهمة مساعدتهم بأسلحة من نوعية أرقى من الحجارة)
لا ألقي اللوم على مصر
أو لست فرحاً بما حدث من مساعدات للأخوة الفلسطينين ولكن الأمر يتعلق بأنها ليست صدقة أو أننا نمنحهم حياة ولكن هي إمدادات يجب أن تعطى لهم من أي بلد عربية تساندهم ولكن الأجدر أننا من يفعل هذا بحكم أنهم ملتصقين بنا جغرافياً على الأقل ولن أذكر المواقف الكثيرة قديماً بيننا حيث حرب 48 وعندما بعثت مصر جنودها ليستشهدوا في فلسطين جنباً إلى جنب مع أشقائهم.
واللهم أعلم إلى أين تتجه الأمور؟؟

28 comments:

Unknown said...

اييييييييييه كفاره يا عم
ايه الغيبه دي كلها نورت البلوج سبوت كلو
الوضع الفلسطيني حاجه تكسف اوي

بوست جميل
تحياتي

الأستاذ said...

emy
ربنا يخليكي بنورك
فعلاً حاجة تكسف بس مش الفلسطيني بس ده كله
شكراً

shreen said...

انها دهايز السياسه الخفيه
القول لا يساوى الفعل
والفعل ليس هو ذاته القول
ليس كل ما يقال هو الواقع
وليس كل ما نراه هو فقط ما يحدث
هناك دوما الجانب الخفى الذى لايراه الا من يعبثون فى الدهاليز السياسيه
ويدركون ممراتها السريه

فلسطين قلوب المصريين باكملهم معها
سواء بالقول او بما نستطيع من فعل

والقضية الفلسطينيه حيه الى ان ينصرهم الله
فقط فلتنهار الامبراطوريه الامريكيه القذره
وسيتغير الكثير
والكثير جدا

المشكله ليست باسرائيل او الكيان الصهيونى

المشكله بالغول الامريكى المساند لها
ماما امريكا
اما طفلها المدلل وحده ودونها فنحن قادرين على تحجيمه

ياسمين حميد said...

ههههههههههههههههه
أضحكتني كثيراً عندما تذكرت كلمات قصيدة عباس:
عباس وراء المتراس

يقظ منتبه حساس

منذ سنين الفتح يلمع سيفه

و يلمع شاربه أيضاً

منتظرا محتضنا دفه

بلع السارق ضفة

قلب عباس القرطاس

ضرب الأخماس لأسداس

بقيت ضفة

لملم عباس ذخيرته و المتراس

و مضى يصقل سيفه

عبر اللص إليه و حلّ ببيته

أصبح ضيفه

قدم عباس له القهوة

و مضى يصقل سيفه

صرخت زوجته: عباس!ه

ابنائك قتلى، عباس

ضيفك راودني، عباس

قم أنقذني ياعباس!!!ه

عباس وراء المتراس

منتبه، لم يسمع شيئاً

(زوجته تغتاب الناس)

صرخت زوجته: عباس!ه

الضيف سيسرق نعجتنا

عباس اليقظ الحساس

قلب أوراق القرطاس

ضرب الأخماس لأسداس

...

أرسل برقية تهديد

فلمن تصقل سيفك يا عباس؟

لوقت الشدة

أصقل سيفك يا عباس

ياسمين حميد said...

حقاً، شر البلية ما يضحك

mesh2dra said...

فعلا
مش لاقية تعليق غير
حسبي الله ونعم الوكيل

السقا said...

اولا انا ماقرتش البوست كله انا قرات اول جزء او اول فقرة وردي حايكون عليها .
بص يا سيدي .....
اولا : اسرائيل فتحت الحدود معنا ودي علشان تكون تمهيد ان امريكا تقول علينا ارهابيين وبنساعد الفلسطينين .
ثانيا : الراجل اللي انت بتدعى عليه ده لحد دلوقتي وبعد مرور 18 سنة او 20 او حتى 5 سنين على دخول العراق وحرب الكويت وغيره من الحجج الخايبة بتاعت امريكا لحد دلوقتي امريكا مادخلتش مصر ومش لاقية الحجة علشان كده امريكا قررت انها هي اللي تعمل الحجة .
ثالثا : بالرغم من الضياع اللي البلد فيه بس ارحم بكتييييييييير من انك تبقى نايم وضرب النار فوقيك احسن من انك تبقى قاعد في وسط اهلك وتعتقل احسن من انك تبقى متزوج وتلاقي اللي داخل يغتصب اهل وانت لا حول لك ولا قوة ....
عذرا على ان كلامي مش واضح او ملغبط او لاني ما قراتش البوست كله لاني تعبان شوية ...

. said...

وبعدين يا استاذي
بما انك مخرج جيد
قللي وبعدين
بكرة الدور علينا
بكرة الدور علينا
اقرى البروتوكولات هتلاقي اول 8 فصول اتحققو
وهما كلهم 24
يعني مش باقي كتير
مزااااااد وبيمرمطو المسجد الاقصى فيه الي بتشد اليه الرحال
اشكرك لطرحك للقضية
دورنا
الغضب
تحياتي

oceaneyes said...

اولا انا بعتذر على تأخرى فى زيارة المدونة ...بس كانت ظروف ملخبطة كدة

وبجد فرحانة انى لقيت بوست جديد لحضرتك ...بعد الغيبة الطويلة دى

انا مش عارفة ارد اقول ايه ...حضرتك تقريبا فعلا قلت كل اللى ممكن يتقال ...ربنا على الظالم والمفترى ..بس كل ده مش مهم

اللى مهم عندى اوى ..هانرد على ربنا ونقوله ايه يوم الحساب ؟؟؟!!!!!



ربنا يستر



تحياتى

:)

Anonymous said...

سياسه
كلها سياسه
ولا انفى وجود أطراف عربيه وفلسطينيه مكن تكون مستفيده من الوضع كده
------
على فكره فيه اخبار مهمه جدا عندى
اوعى تفوتيها
www.pinsywinsy.blogspot.com

rommantic said...

كلامك جميل
ده اكتر حاجه عرف اقولها

dr.Roufy said...

مزاد أنبوليس..الرهيب
اتباعت فيه القضية الفلسطينية
وللأسف الى دفع التمن هو احنا

الوضع الحالى..قتل اي كلام ممكن يتقال
حتى الكلمات توارت خجلا!!

Unknown said...

بص ياسمير
موضوع ان فلسطين بتتباع مش جديد عليهم
المشكلة اني شيفاك منحاز ومتعاطف جدا انهم يعبرو الحدود دي بطريقة غير رسمية وان اسرائيل ذات نفسها بتقول انة اسعد يوم في تاريخها اللي عملوة فينا الفلسطنين
احنا طبطبنا كتير
ووقفنا جنبهم كتير وانت بنفسك قولت شهداء 48واكتر ناس بنتصدر اول ما تححصل حاجة
لكن دي حدود دولة يابني مينفعش يجيبو عربيات تهدلهم السور ويدخلو يكسرو ويضربو المصرين في رفح
ونقف نطبطب ونقول قولبنا معاهم اصل بلدنا مش سايبة
دي حدود ولازم يبقي ليها احترام ويوم مايحبو يدخلوها لازم ياخدو تصريح من مصر وليهم حدود ايش ضمنا الناس اللي داخلة دي مش فيهم اسرائلين وناس من فلسطين ذات نفسها اتصلو في برنامج وقالو ان الناس دي الطبقة الوضيعة في فلسطين وانهم بيتاسفو للحصل وان حماس كان باديها تصدهم لكن هي عاجبها الموضوع
دة غير انهم فاكرنا هبل وهنسبهم يدخلو سببهللا
الموضوع مش هيفسد اي تعاطف مع فلسطين لان مش كلهم بالهمجية دي بس المشكلة ان لازم يبقي لينا واقفة ونفهمم اننا بلدنا مش سايبة ولا سهلة علشان يعملو فينا كدا
سلام

the others said...

أخيرا

على العموم اسرائيل سمعت انها هتعمل حاجز تاني جنب معبر رفح علشان تبقى في التمام مش عارفه قريت عن الكلام ده ولا لأ ؟؟

البِـئرُ والظمّأْ said...

ازيك يا استاذ
الف حمد الله على السلامه
ارجه بقا ببوستاتك اللي محوشهالنا




حسبي الله و نعم الوكيل بجد
على فكره طريقه السرد حلوزه جدا

زيزي

شريف طلال said...

بعد كل الغيبه دى رجعت بموضوع قوى
و ميه ميه و انا متفق معاك فى كثير من النقاط
تحياتى على الموضوع الجامد

abo salah said...

بعد السلام عليكم

ازيك يااستاذ واحشنى والله
ويارب تكون بخير وعديت من الامتحانات بخير

عامة ليا نصيب اقولك كل سنةوانت طيب فى ميعادها
وكل سنة وانت الى الله اقرب ومحقق كل اللى نفسك فيه

وبخصوص بوستك مش هاقول غير زى ماانت قولت فى لاخر
الله اعلم الى ان تتجه الامور

تحياتى

bota said...

السلام عليكم
كويس اني دخلت المدونه بتاعتك
يوم عيد ميلادك
كل سنه وانت طيب ويارب سنه سعيده عليك تحقق فيها كل تتمناه

اما عن الموضوع بجد مبقتش قادره احدد مين صح ومين غلط

ربنا يوفقك

mesh2dra said...

استاذي

اولا
كل سنة وحضرتك طيب
عيد ميلاد سعيد ان شاء الله
وايام جاية اجمل
تحقق فيها اللي انت عاوزه
الايام اللي جاية افضل ان شاء الله من اللي راحت
وبكرة تقول مش قادرة قالت :)

ثانيا بقى
انت فين من التدوين

حياة سعيدة ان شاء الله
:)

سلاماتي

مدونة يلا نفضحهم said...

ما أروعه محراب التدوين الذي جعلنا نعرف ونتعرف علي الكثير من المدونين الشرفاء الذين إمتلأت قلوبهم وعقولهم بحب هذا الوطن والعمل والسهر علي رفعته وعزته والقضاء علي الظلم الذي يستشري بين جنباته ....

=======================

إنضم معنا في حملة الألف مدون للإفراج عن المدون الدكتور إبراهيم الزعفراني
علي مدونة يلانفضحهم : http://www.yallanefdahom2.blogspot.com/
الدكتور الزعفراني الفارس النبيل

صحفية روشة said...

الاستاذ السياسى الكبير
انا ادمنت مدونتك
سلام

الأستاذ said...

سوري على تأخيري في الرد يا جماعة بس أهلاً بيكوا في أي وقت
shereen
كلامك في الصميم وفضح واقعنا وكشف عن ذلنا ليهم

ياسمين حميد
قصائد عباس دي رهيبة جداً وتعكس ما يجري وما جرى وع اللي جرى


mesh2dra
ولا يهمك كفاية إنك جيتي

السقا
لأ عادي ولا يهمك هو مش ملغبط هو ملخبط حبتين بس

sad_doraa
للأسف مقرأتش البوتوكولات كان نفسي بس أحياناً مش بصدق الكتب دي أكيد مش إسرائيل اللي نشرتها علشان تفضح نفسها

الأستاذ said...

oceaneyes
ولا يهمك مكنتش هطلع بالبوست من غيرك أكيد المهم إنك جيتي وشرفتيني وعندك حق هنرد نقول إيه؟ وسلمولي على عمرو

وينكي
دايماً تيجي تضربيلك إعلان وتمشي بس شكراً على كلمة أطراف دي بحس إنها بتجيبلي تنميل في الأصابع

rommantic
شكراً بجد أسعدني وجودك وتعليقك كفاية كدة ده اللي أنا عايزه

dr.roufy
أهلاً .. هي فعلاً الكلمات توارت من زمان

my hope$
دايماً بنختلف في حاجات كدة بس كويس

the others
أهو أديني جيت أهو
بس الصراحة مقرأتش عن الكلام ده .. يلا م هي ناقصة

meekness!!!
يااه أهلاً
ربنا يخليكي ويخلي طريقة السرد دي

شريف طلال
شكراً لرأيك المهم وربنا يكرمك

الأستاذ said...

abo salah
يااااه أزيك يا أبو الصلح ليك واحشة يا راجل
عامل إيه؟؟
ربنا يكرمك ياربن ويوفقك

bota
أهلاً وسهلاً شرفتيني بالزيارة دي وياريت تتكرر وصدفة كويسة إنك تيجي في اليوم ده ده أكبر إحتفال ليا والله
كل سنة وحضرتك طيبة
والله محدش عارف مين الصح ومين الغلط مع إنه باين جدا

mesh2dra
شكراً ليكي وكويس إنك جيتي تاني وكل سنة وإنتي طيبة ويارب عقبالك مش عارف لما تتمي أد إيه؟

مدونة يلا نفضحهم
شكراً للزيارة الجميلة دي وأنا الصراحة مش عارف إنتوا مجموعة ولا واحد المهم أحييكم على موقفكم ومجهودكم ده وربنا يكرمكم ويكرمكن كلكم وكلكن إن شاء الله

الأستاذ said...

صحفية روشة
آه يا أهلاً بالروشنة كلها .. أيوة كدة روشيلنا التعليق وشكراً على إدمانك ده لكن تذكري إن مش أنا اللي أجبرتك علشان خط نجدة الطفل موجود أهو وأنا مليش دعوة
بس شرفتيني بزيارتك وكل سنة وحضرتك طيبة بمناسبة م كان عيد ميلادي إمبارح
مع أطيب تمنياتي بمزيد من الروشنة
تحياتي

Empress appy said...

حلو قوى البوست الكتيرررررررررررررر قوى ده عجبنى جدا بس ليه سؤال حد فاهم حاجه فى ظل الاعلام دلوقتى واللى بيحصل فى فلسطين بجد حطه ايدى على قلبى

الأستاذ said...

appy
شكراً على كلامك الجميل
فعلاً "محدش فاهم حاجة" من اللي بيحصل
ويارب نفهم

كلمتى said...

السلام عليكم
شكراً لتشريفك مدونتى
اما بالنسبه للبوست ده
فقد نسى رئيسنا المبجل قول الرسول (ص)
(لا يؤمن أحدكم حتى يحب لأخيه ما يحبه لنفسه )
فلو تخيلنا اننا مكان الفلسطينين كنا نحب يتعاملوا معانا ازاى؟
سلاااام