مرة من المرات التي كنت فيها في مترو الأنفاق وكنت ذاهباً للجامعة على ما أذكر وكالعادة الـ "mp3" في أذني "في ودني يعني" علشان بس محدش يفتكره مرض المهم وعادي بسمع أغاني أكيد يعني وواقف زي الناس الواقفين في المترو الجديد أدام الكنبة اللي بيقعد عليها الناس عادي وكنت مستني الفرج زي الناس التانية اللي واقفة وكان قاعد شخص مش فاكر مظهره وجنبه واحد شاب بدقن وجلبية "بارمودا" اللي هيا علشان متبقاش لامسة الأرض حتى لو قعد وطبعاً تحتها بنطلون "البيجامة" باين أو حاجة كدة ولابس شبشب كل ده عادي معترضتش على مظهر الشخص ده اللي بيقولوا عليه "شيخ" أول م يشوفوا إنه مربي دقنه ولكن أنا من زمان لي موقف مع الهيئة دي بتاعت إن أي حد لما يجي يربي دقنه لازم يسيبها ميلمسهاش ولا يهذبها ويلبس نفس اللبس ده, المهم ولا كان في بالي حاجة من ناحيته أنا مالي هو حر زي م أنا حر إني أعمل اللي أنا عايزه (رغم إني مش بحب أسقط البنطلون لكن مش بوقف شعري بالجل) مش بحب أبقى كدة وخلاص.
ومرة واحدة قام الراجل اللي أدامي علطول ومكانش حد واقف جنبي منتظر إنه يقعد وأنا المرشح الأول للكرسي الفاضي ده ولكن ...
راح "الشيخ" منادي لراجل واقف هناك بعيد شوية هو كان شعره أبيض بس مش معناها إنه عجوز وكمان واقف م قالش حاجة ولا جري على الكرسي زي الناس اللي عندها "حُب الجلوس" وخلاص وتلاقيهم أول م يدخلوا من الباب عمالين يتنططوا في العربية كل م يشوفوا كرسي فضي على أمل إنهم يقعدوا وفي الآخر اللي أدام الكرسي هو اللي بيقعد وده "العُرف" المتعارف عليه في المترو بالنسبة للعبة "الكراسي الحكومية" قصدي "الكراسي الموسيقية" ده كل غير إني مشوفتش الراجل ده أصلاً واقف لأنه كان ورا ضهري هشوف إزاي ؟؟ لكن لما "الشيخ" ناداله لأ وإيه ؟ اتخارله "اتحرك في المكان اللي فِضي يعني" من مكانه للمكان الفاضي اللي قدامي علشان أنا معرفش أقعد وعقبال م أروح الناحية التانية يكون الراجل جه يقعد المهم مرضيتش أحارب على الكرسي زي م الناس بتعمل وقولت أخليني أنا الكبير رغم إن شعري مش أبيض وأخليني واقف و جَت من عند ربنا فِضي كرسي ورايا اللي أصلاً كان الراجل اللي جه قعد واقف أدامه ده بعدها بدقيقة واحدة بس وطبعاً محدش كان هيقعد وكمان واحد نادالي وقالي تعالى اقعد لأني مكنتش واخد بالي من الكرسي وكمان مفيش حد غيري واقف.
بعد م قعدت في وش "الشيخ" ده واللي هو أصلاً كان قاعد عمال "يلعب في دقنه" زي م بيعملوا كلهم أو معظمهم وفاضي وباصصلي وأنا باصصله وكأني بقوله أديني قعدت برضه ربنا عايز كدة لكن بعمل حاجة على الأقل بسمع الأغاني ومش مدايق حد مني بصوتها العالي لأنها في ودني لكن اللي جنب "الشيخ" واحد عادي خالص وحالق دقنه زيي وهو اللي ماسك المصحف وكمان مكوناش في رمضان وعادي إنه يقرا وأنا كنت مبسوط لكن ليه "الشيخ" ده عمل كده؟ هل لأني بسمع أغاني ومش مربي دقني؟ ولا علشان صغير ؟ والكبير اللي واقف بعيد أحق ؟؟ طب م أنا ممكن أكون بسمع قرآن ولا بتعلم لغة أو أي حاجة بسمعها غير الأغاني وبعملها كتير وهو هيعرف منين؟؟؟
(على الأقل مش زي العيال "السيس" اللي بتطلع وماسكة الموبايل المنتشر اليومين دول لحد م بقى "سيس" وعلى رأي المثل "الموبايل في إيد السيس سيس" ومشغلين أغاني "سيس" أكيد ومعليين الصوت ولا اللي جاي من الشغل تعبان وبينام على نفسه عارف ينام ولا اللي جاي من المدرسة ولا الكلية عارف يريح حبتين من وش الدكاترة اللي يوجع الدماغ ولا اللي بيقرا قرآن عارف يقرا)
هل أنا بالنسبة له كنت فاسد؟؟؟
الله أعلم بالنوايا
موقف تاني وعلى النقيض تماماً : كنت مرة برضه في المترو بحُكم إني بقضي معظم حياتي فيه "مش تسول أو ببيع حاجات وكدة" ولكن لأن سكني يُحتم عليَّ أستخدم المترو فقط ولأني بتعب من غير المترو في أي مواصلة حتى العربية الملاكي , وكنت مرة من المرات وبرضه "ضارب" الـ "mp3" في ودني , وأنا واقف وطلع راجل عجوز ماشي بالعافية ودخل يسند على ظهر كرسي وأنا أدامي ست ومعاها ولادها مقعداهم جنبها على كرسي مخصوص والعيال مش هاين عليها تقعد كمان دول كل شوية يقوموا يبصوا مش الشباك ويرجعوا يقعدوا تاني وأنا أول م شوفت الراجل ده قولت ده المفروض يقعد بس تقول إيه؟
المهم الست كانت نازلة أخيراً هي وعيالها بعد مدة صغيرة فقولت "الحمد لله أقعد بقى , طب والراجل؟ يعني هو هيموت؟" لأ طبعاً ده شيطان نفسي هو اللي كان بيقول كدة ,روحت منادي للراجل وجه علشان يقعد و"قعد" يقولي بس وهو "واقف" لأ اقعد انت وشكراً ونازل وكدة لحد م قعد وأدامه كرسي فضي وأنا قعدت و شوية جه راجل كبير وصحته حلوة الحمد لله مش ضايع زي الأول وشعره أبيض برضه بس بدقن حلوة كدة على أدها وشكله مقبول للناس وواقف ناحيتي مش كأنه بيقول" حس على دمك وأقف" لأ كان مش في باله روحت قومتله وقعد يقولي لأ مش هقعد لحد م الكرسي خلاه فاضي فترة وعرف إني مش هقعد فقعد الحمد لله وطلع مصحف وقرأ فيه وبعد شوية فضي الكرسي اللي جنبه وأنا قعدت لما قالي تعالى أهو اقعد.
وهما نازلين كل واحد كان بيقولي "جزاك الله خيراً" وربنا يديك الصحة وبيدعي من قلبه أوي , أنا كنت فرحان جداً أول مرة أسمع دعوة كدة من حد معرفهوش بجد وتكون صادقة وفي نفس الوقت كنت حاطط السماعة في ودني وشيلتها علشان أسمع ونزلوا وقعدوا يقولولي دعاوي شبه إسلامية مش بسمعها للشباب كتير لأني كنت سايب دقني شوية محلقتهاش هي مكانتش كبيرة لكن باينة إنها بقالها إسبوع كدة
والحج التاني اللي ماسك مصحف بعد م خلص كلمني برضه وقالي كلام زيه وحلو أوي
هل افتكروني بسمع قرآن؟؟ ولا تغاضوا عن إني بسمع إيه وملهمش دعوة والمهم إني مضرتهمش سواء قومتلهم ولا لأ!
هل ساعتها إفتكروني شيخ؟؟؟
الله أعلم
قد يكون الموقف الثاني ليس واضحاً بقدر الأول ولكنني فعلاً لا أذكر لأن ذاكرتي بإجازة مرضية من فترة والظاهر عندي "الزهايمر" وربنا يستر لكن أحببت أن أنقل لكم تناقض المجتمع وتناقض أنفسنا أحياناً
ولكن أنا مش ضد أي حد ومش متعصب ولا متطرف و ياريت لما تقروا محدش يفكر في صفات وحشة أو خصلات عدوانية تجاهي أو أنها نابعة مني تجاه الأشخاص في هاذين الموقفين
وعلى فكرة الكلام ده كان قبل رمضان علشان بس حكاية سماع الأغاني وكدة لكن أنا أصلاً حتى قبل رمضان كنت زهقت من الأغاني وبطلت أسمع لفترة لمجرد إن مفيش جديد للناس اللي بحبهم أو اتخنقت وكدة لكن أنا لو نزل حاجة عايز أسمعها في رمضان بسمعها أو حتى أنا أصلاً بسمع الشيخ إمام علطول لأني لسة مكنتش سمعت كل حاجاته
(وفي رأيي مفيش مشكلة إني أسمع أغاني في رمضان زي م بسمعها قبل رمضان أو بعده طالما إني مش بعمل حاجة غلط ومقتنع بده لكن كل الفكرة إن طول السنة بنسمع أغاني ومش بنقرأ قرآن ونيجي في رمضان كمان ده هو شهر فنقضيه طاعة وعبادة ونقرأ قرآن ونحترم نفسنا شوية ومفيش مانع نقرأ قرآن في غير رمضان زي م هو مفيش مانع إننا نسمع أغاني في رمضان والمسألة مبدأ في الأول والآخر ودي حاجة نسبية)
معلش برضه الموضوع طويل لكن استحملوني مش بحب أسيب حاجة مقولهاش
