Saturday, October 27, 2007

الجزء الثاني : فتوى السيد أوكاوي الثانية تتسبب في خلافات بين العائلة المباركة

وتستمر "فتاوي" - بكسر الياء- "السيد أوكاوي" وهو المعنى الشعبي المتداول بين المصريين بأن من لا يعلم "يَفتي" وفقاً لمبداً "الفتوى في فم الجميع" ،وليست "يُفتي" التي بمعنى "فتاوى" -بفتح الياء- والمعروفة للجميع أنها من إختصاص رجال الدين أو بالأخص القائمين بالفتوى والمعتمَدين بذلك والتي تخص الأمور الدينية والدنيوية المتعلقة بالدين أيضاً ولكن ...
وعندما يقرر أن "يُفتي" أحدهم في أمر ما فيجب أن يكون على دراية به وأن يدرسه جيداً وأن يكون في مجال إختصاصه أو له شأن به "من الآخر ليك فيه" لكن السياسة أرى أنها بعيدة جداً عنك كما أن لعبة "كرة البيسبول" بعيدة عني.
فبعدما تقرر تنفيذ عقوبة "الجَلد" بدءاً من المدارس حتى يخرج الجيل القادم وقد نشأ على هذه العقوبة ويحمل علامات تدل على أنه "لا يُجلد إلا الشاطر" أو كما قيل فيها "رجعوا الأساتذة يا عم حمزة للجلد تاني" فقد خرج التلامذة في مظاهرات تندد بتلك العقوبة مرددين " يا عم حمزة حلمك علينا .. إحنا التلامذة وبكرة لينا".
وبعدما فرغنا من الجزء الأول الخاص بـ (جلد الصحفيين) نأتي للجزء الثاني والذي لم أكن أعلم أنه سيأتي أصلاً
* التوريث *
وإنت مالك:
إذا كان جمال بنفسه هو القائل "مش عايز الحكم" وقال في حديث مع "لميس الحديدي" في لقاء بنفس الحرف الوحد "ليست لدي نية في الحكم" وأخذ يردد بشدة مرادفات أنه يرفض السلطة أو أن يحكم أو على الأقل يُوَّرَث ويتعجب من أن الشعب يتخذه "كبش فداء" لوالده وأنهم -سبحان الله- يلمِّحون إلى أنه شئ بديهي أن اللعبة ستنتهي بأنه سيأخذ العرش بصفته في الحزب والأمين العام للسياسات وطبعاً بأغلبية الأصوات.. و"بغض البصر" عما إذا كانت "ليته" سليمة أو إن كان الأمر خطة محبوكة أو سيناريو ملعوب ، إذاً "كل واحد وليته".
وهذه الفتوى تأتي بعد فترة ليست بعيدة عن سابقتها
ففي جريدة "البديل" كان عنوان هذه الفتوي:
(فقد أفتى "السيد أوكاوي" -مرة أخرى- بإباحة التوريث وأن من حق الإبن أن يرث أباه)
وحتى لا أقوِّل عليه كلاماً سنتعرض لهذه الفتوى أيضاً بالتحليل :
أولاً: التوريث > يقولها بصراحة أن هناك شئ إسمه التوريث وهو المصطلح الذي اصطلح عليه الشعب في مظاهراته مما يغيظهم أن ما توقعوه سيحدث من تولي الأبناء حكم "الوالي" حالياًَ مطالبين بأنه إذا حدث ذلك فنحن لسنا في عصر الجمهورية وإنما مازلنا في عهد الملكية وإن كنا سندخل في هذا الموضوع ، فالشعب الآن وقد أعجبه فترة الحكم في عهد "الملك فاروق" بعد مشاهدة المسلسل وحينما علموا بأن هناك إتجاهاً يقول أنه كان ملكاً صالحاً بعدما قام بتجسيد الدور "تيم حسن" ببراعة تفوق التخيل وفي أعتقادي أنه أدى الدور أفضل من "الملك فاورق" نفسه ،فسيطالبون بعودة ولي العهد "أحمد فؤاد" ابن "الملك فاروق" كي يحكم البلاد طالما أن الأمر "توريثاً بتوريث" ولكن حدث بعدها أن هاجم بعض النقاد "الملك فاروق" بشدة وانتقدوه وأكدوا أنه كان عميلاً للانجليز وأنه ملكاً فاسداً في الحقيقة وليس كما صوره المسلسل ، وبين هذا وذاك تشتت الشعب مما جعلهم مستعدون للخروج في مظاهرات مطالبين بتولية "تيم حسن" نفسه ملكاً للبلاد، من باب "الحاكم اللي تعرفه أحسن من الحاكم اللي متعرفهوش".
ثانياً: إباحة التوريث > أي أنه كان شئ محرم ومسكوت عنه من قبل ولكن وفقاً للظروف الطارئة الآن فسيبيحه "هو" بنفسه لولي العهد القادم وكأنما الأمر في يده ، تشبيهاً بأنك في صحراء ويحل لك شرب الخمر بدلاً من الموت.
ثالثاً: من حق الابن أن يرث أباه > استناداً لحكمة "من وَرِثَ أباه فما عَصَى" وكأن الأمر تحول إلى تقسيم للتركة وإن كان يستند في هذا إلى (آية الدين) فلعل القمسة غير منصفة , لأن هناك إبن آخر وزوجة والسيد أوكاوي نفسه الذي سيشهد تقسيم "مصر" على "العائلة المباركة" كلها (وإذا حضر أحدكم القسمة) ... حتى يحصل هو على دار اللإفتاء والأزهر الشريف نظير خدماته الطويلة في هذا المجال ،وفي هذا جحود منه وموالاة لأحد الأبناء على الآخر وفي إعتقادي أن المسألة مسألة عقاب حينما أعلن الآخر عصيانه ولم يخطط للحكم معهم ولم يشترك في اللعبة من البداية ولم يخاطر إذاً "ملهوش فيه" وعلى رأي المثل "ما شافوهمش و هما بيحكموا شافوهم وهما بيورثوا".
وفي اعتقادي الشخصي أن الأمر لن يقف عند هذا الحد ولكننا ننتظر فتاوى أخرى كثيرة ستغير مصير هذا البلد
وسأتكهن في الجزء الثالث من تفسير كتاب السيد أوكاوي "الفتاوي الكاملة للسيد أوكاوي" بتحليل وتفسير الفتاوى الأخرى القادمة إن شاء الله

68 comments:

TAMTAM said...

ده انت داهية مسيحة يا ابني

على العموم انا من موقعي هذا اعلن عدم معرفتي بيكي لحسن تيجي الطوبة في المعطوبة ويمسكو فيك على اساس انك بتروج اشاعات ان جيمي حيمسك الحكم وهو قال بالفم المليان مش عايزه ..مش عايزه يابابا

ومن منطلق الفتوى اللي فاتت حتتجلد يعني حتتجلد

وبما ان في سوريا مسكو مدونة (مش فاكرة اسمها الصراحة) وخطفوها وحققو معاها عشان يعرفو مين اللي رد عليها في موضوع سياسي كانت كتباه وهي رددت عليه ليه بما انها متعرفهوش

فانا بقولك يا استاذ من دلوقتي ابقى اعمل الردود بكلمة سر تتفق عليها مع المدونين وانت بتقابلهم

تحسبا للمستقبل يعني

والله المستعان يا ولدي

الأستاذ said...

tamtam
أشكر حماسك لعدم رؤيتي أَجلد
ولكن أحب أن أطمئنك أنني لو لم أكن تلميذاً لوددت أن أكون أستاذاً
وسأبقى كما أنا لا أخاف ولا أهاب "أي حد لا مؤاخذة" بيقولك خد رئاسة الحزب تاني وتقوليلي سوريا
سوريا بقى مش هنا هنا في ديمقراطية وحرية تعذيب
دلوقتي في طريقة جديدة وهي الجلد زمان كانت النفخ والسلخ بس وربما يستر من اللي جاي يا بتي
تحياتي

3ala asm masr said...

بجد لا تعليق غير حسبى الله ونعم الوكيل
خد بالك من نفسك يا استاذنا

My Hope$ said...

سلام عليكم
ازيك يا استاذ
بجد مسخرة
احلي حاجة عجبتني
فكرة ان تيم يبقي الرئيس
وبعدين انا اول واحدة هصوتلة
بنعم نعم لتيم
ياسلاممممم حد يطول يااخي
يلا كلها ستين سنة ونعرف مين هيجي بعد الرئيس هانت متستعجلش ياخي
العزيز
يلا سلامممممممممم

الأستاذ said...

3ala asm masr
حسبي الله ونعم الوكيل
وأشكرك على النصيحة وخلي بالك إنتي الأول من نفسك لأنك بتدخلي هنا
أنا تبعهم أصلاً
تحياتي
--------------------------
my hope$
آه يادوب ستين سبعين سنة كدة ويكون إبن تيم كبر ويقدر يمسك الحكم
إسمه ورد
يا سلام ده أنا أبيع عمري وأشوف الحاكم بتاعنا إسمه ورد وساعتها مستعد يجلدني بنفسه
شكراً ليكي
سلاممممممممممم

DoMaLaYs said...

على فكرة

احنا في المعتقل لا محااالة

كلامك واقعي

و حسبنا الله و نعم الوكيل

الأستاذ said...

domalays
أهلاً بزميل السجون
إدعيلنا بقى كدة وابقى زورني بعيش وجنبة شيدر لأني بحبها أوي أوعى تجيب حلاوة مش هاكلها هي على العموم مش هتترمي في هناك ناس نفسها تشوف ديل خرتيت تاكله يملأ جوعها
تحياتي

Loving Anabel said...

شفت جيت بسرعة ازاى عحبني فعلا و كلامك مسخرة

الأستاذ said...

loving anabel
أشكر حضرتك على هذه السرعة التي لم يلاحظها رادار الحكومة
وعلى التعليق والإستجابة والزيارة
يعني ليلة
شكراً وتحياتي

EmY said...

يا عم حاسب علي نفسك ده انت كده هاتبقي جلد و سلخ كمان ده لو فضلت عايش

توريث ده علي اساس انها عزبة المرحوم ابوه الي وارثينها عن مبارك الكبير

الشعب لا يورث الامانه لا تورث الزعامه لا تورث
طيب ما نجيب ولاد عبد الناصر كده عداهم الدور

عيب اوي علي الازهر كده
الشيخ نسي هو دوره و وظيفته ايه و بقي يهرتل مش يفتي

يا جماعه حد يروح يكبرله في ودنه و يفوقوا من الي هو فيه

انت بجد استاذ الموضوع جميل اوي احييك عليه

الأستاذ said...

emy
شكراً يا إيمي
ربنا يكرمك ويخليكي
بيسعدني تواجدك في التعليقات وردودك
وربنا يجيب العواقب سليمة
تحياتي

السقا said...

والله انا بقى ليا رأي شخصي عارف انكم حا تعارضوني فيه بس عاوز اقوله :
اولا : اللي نعرفه احسن من اللي مانعرفهوش ... يعني لما مبارك الابن يمسك الحكم احسن من واحد مانعرفهوش على الاقل عارفين ان مبارك الابن كده كده واكلها واكلها بس حا يكمل مشوار مبارك الاب في انه يحافظ علينا من بطش امريكا ... اللي بيحصل في البلد ده تحكم من امريكا وطبعا مبارك الاب هو اللي سلم رقابينا ليهم ... بس هو دلوقتي مخلينا عايشين واكلين شاربين ازاي مش مهم ازاي المهم انك واكل شارب مش مهم نايم نام في بيت اهلك .... اما بقى لما يجي واحد غريب حد عارف ده نظامه ايه ما جايز يكون العن .. يبقى ايه (اصخم من سيدي الا ستي) انا ما اعرفش هو بيتقال ازاي بس مشوها كده .
ثانيا : امسك يا مبارك الابن الحكم بس بشرط بانتخابات حرة مش ملعوب فيها كالعادة اقلها لما تعمل مصيبة تلاقي الشعب جنبك .
ثالثا : نفرض مجرد فرض ان الانتخابات طلعت سليمة وواحد تاني مسك البلد يبقى اكيد حا يكون كويس لانه من اختيار الشعب المصري اللي هو اصلا في غيبوبة الحشيش وغيره من المحرمات اللي ما فيش فتوى بتطلع تحرمه .
لان ما هو ممكن ما يمسكش مبارك الابن ويمسك واحد من تبعهم برده ويعكها حبة لحد لما مبارك الابن يرشح نفسه ويا خدها .
يعني من الاخر برده مبارك الابن ماسك البلد ماسكها بس ساعتها حيبقى (ماسك الهوى بايده) لان مش حايكون في بلد .. ويا عالِم يمكن ربنا يستجيب لدعاء بلال فضل اللي قال فيه (اللهم انك تعلم ان الموت راحة لنا من عيشتنا فارحنا من الاخر ... اللهم خذنا اليك اخذ عزيز مختفر بدلا من ان ياخذنا الى القسم مخبر زفر ... اللهم سلط علينا سيف خطابك فهو ارحم من رحمة حكمنا بنا ... اللهم اننا نعلم انك تبتلينا بحياتهم فنرجوك بان تبليهم بموتنا علشان ينزلوا ومايلقوش حد يكموه ... اللهم ارنا فيهم يوم اسمود او يوم وخلاص ... اللهم اننا نرجو منك وسيلة مساعدة ولو حتى حذف حاكمين ... اللهم سلط عليهم من يطبق عليهم اطباق شوربة لكي ينفخوا في زبادينيا ... اللهم حمض اكلهم ونشش بيضهم واحرق صورهم لما يروحوا يستلموها ... اللهم عطل مواكبهم واكسر مناكبهم واقف مراكبهم واكسر عينهم ومسكنا عليهم زلة يا كريم ... اللهم سلط عليهم من يقلب عليهم الترابيزة ويضربهم تحت الحزام واقفل ابواب رحمتك على اصابعهم انك انت الفتاح العليم )

الأستاذ said...

السقا
أولاً: ده رأي حضرتك وإنت حر فيه وأنا أحترمه وأحترمك
ثانياً: أنا أعارضك تماماً كما كنت تتوقع
لأن اللي مخلينا متخلفين ومسروقين وساكتين إننا دايماً مقولة "اللي نعرفه أحسن من اللي منعرفهوش" دي لازقة في أفواهنا مش بنسيبها وخايفين نروح لحد جديد ليطلع أنيل مش يمكن يطلع أحسن؟ طب لو طلع انيل إحنا خسرانين إيه يعني ؟ م كدة كدة واحد خلاص كل وشبع وهضم الشعب من زمان نسيب غيره ياكل وبدال م خير مصر يروح في معدة واحد بس يتوزع على الحكام اللي بيفكروا يحكموا مصر كلهم
ومعتقدش إن فيه ألعن من اللي إحنا فيه أصلاً
حتى لو فيه يبقى أهو الواحد بيشوف جديد وزي م بيقولوا "اللي يعيش هنجيبله قرش حشيش" لأن لو واحد جديد جه وخربها أكيد محدش هيستنى فيها لو حصل هيبقى هو هيسطله علشان الشعب ميفوقش
ثالثاً: مش عارف ليه مش بقبل بلال فضل وكمان مش بحب نقل كلام على لسانه أو حتى على سنانه
رابعاً: إنت مش شايف إنك باللي الكلام اللي إنت كتبته ده واللي هو قاله مفيهوش حاجة غلط؟؟ وعادي كدة يعني؟؟؟
ركز في آخر كام سطر كدة إن مكانش كله أصلاً .. أنا بقى دي من الحاجات اللي مبحبهاش .. إحنا مش بنهزر مع ربنا
خامساً: استغفر الله العظيم أنا بقول لنفسي على فكرة

بلا عنوان said...

الأسلوب مميز كالمعتاد

بس أنا حاسه ان الموضوع اتحمل أكتر مما يستحق

أصل لو فعلا عاوزين يحطوه مكان والده المصون يبقى هيتحط هيتحط وماحدش هيقدر يعمل حاجه وكلنا هنحط لسانا في بقنا ومش هنقدر نتكلم أو بالأصح نعمل حاجه....

وبعدين يا جماعه ما الشيخ الطنطاوي قالها في اليوم السابع مع محمود سعد

أنه يرفض التوريث اذا كان بمعنى أن يقول الرئيس صراحة ابني من بعدي
أما لو أختير بالانتخاب فلا حرج في ذلك
وطبعا شئنا أم أبينا لو عليه العين والنيه يبقى هيتم انتخابه يعني هيتم انتخابه

تحياتي

dr.Roufy said...

وتستمر الحلقات عن السيد أوكاوي قدس الله سره
وأعتقد انها ستتوالى طويلا..مادام السيد أوكاوي ..جاثما على ..كرسي الفتوى..الأزهرية
وكل يوم يثلج صدورنا بالجديد..والمفيد
يعني دا ممكن نعمل عنه مسلسل..أطول من ليلي الحلمية
لكن هنا الليالي هاتبقى سودا على دماغنا
:)

بجد استمتعت بتحليلاتك ..فعلا أستاذ
ومنتظرة البقية
..للأسف مابقاش في تعليق ممكن أقوله
غير..

يُمهل ولا يهمل

تحياتي

الأستاذ said...

بلا عنوان
أشكر تلبية حضرتك للدعوة
لكن قصدك خد أكتر مما يستحق في إيه بالظبط؟
إنهم بيماطلوا وخلاص والموضوع محسوم؟
ولا إني استنفذت الفكرة مرة وملهاش لازمة في تكرارها؟
على العموم كلامك اللي بعد كدة يفسر الإحتمال الأول
لكن أكيد أوكاوي راح لمحمود سعد بعد م ضرب الفتوى وولع الدنيا
تحياتي
--------------------------------
dr.roufy
أشكر سعادتك على الإطراءات دي وأنا فعلاً بستمتع بآرائكم وموضوع المسلسل ده فكرة مش بطالة وإحتمال تتنفذ إن شاء الله أما بالنسبة ليمهل ولا يهمل فده أكيد طبعاً لا محالة إن شاء الله برضه
تحياتي

mesh2dra said...

السلام عليكم

بجد
حصل فتوى زى دي
؟؟!!!!!!

من ورث أباه فما عصى
هههههههههههه

الجزء الثالث ده انت فاضيلهم بقى:P

وماتسمعش للي بيقولك خد بالك من نفسك
خلاص الحوارات دي خلصت من زمان
فيه حرية رأى وتعبير
ولا انت رأيك ايه:PPPPPP


مش قادرة
عضو بالحزب الوطني

bastokka طهقانة said...

يا اخي اذا كان عم اسماعيل بتاع الكبدة ورث عربية الكبدة لابنه دومة و عم صليب بتاع الفول ورث القدرة لابنه حنا حتيجي على الراجل الكبير مش من نفسه يورث الكرسي لابنه
و بعدين هو لما يقول مش عايز احكم من باب اتحايلو عليا علشان اوافق

يعني لمونة في بلد قرفانة
اه و النبي قرفانة
قرفانة قرف


حيروحوا فين من ربنا

ابقى تقل الدقة
:))
اوروفوار

مواطن زهقان said...

بجد موضوع رائع يانجم
وبحييك على اسلاوبك الجميل

وعن اذنك اروح اقراه تانى

خلود صلاح said...

ممم يمسكه ولا ميمسكوش؟؟
ميمسكوش ولا يمسكه ..؟.
ربنا يقدم الى فيه الخير
يبقى لازم يمسكه
تحيا جمهورية مصر العالمية
قشطة قشطة .. انا معرفكش اصلا
بس ممكن ابقى اجى ازورك .. مش تقلق يعنى :))

Desert cat said...

ده مش اكاوى وبس
ده السيد الاستاذ الدكتور صاحب الفضيلة المهندس الفنان
كل حاجه بصراحة بيعملها
الراجل ده بيتعب اوى علشانا بس احنا اللى مش بنقدر

رينـــــــــــا said...

ان لله وان اليه راجعون
ربنا يهديه
المشكله انه عالم
والعالم ان أخطأ له أجر وان اصاب له اجران
ربنا يهديه يارب ويرجعه للحق

الأستاذ said...

mesh2dra
حمداً لله على السلامة إيه الغيبة دي كلها
طبعاً عندك مش هنا لأنك كنتي مفيش جديد وعادي كدة؟؟
إيه ده صح؟ يعني إنتي تغيبي كل ده وترجعي تبعهم؟؟ ولا هما خدوكي عذبوكي وكانو بيجربوا فيكي الفتوى الأولى وخلوكي تشتغلي مرشدة معاهم
يلا المهم كويس إنك جيتي .. شكراً لردك
-------------------------------
bastokka طهقانة
لأ طبعاً معاكي حق م اللمبي برضه ورث عربية الكبدة عن أبوه لما قاله إن سندوتش الكبدة بنص والسجق ب75 ورغم إني مبحبش اللمبي إلا إني بحب الكبدة والسجق
أقصد من الكلام ده إني بحب مصر
أوك .. بلاش أوك دي
ماشي حاضر هزود الدقة من عينيا .. أو من الإزازة يعني
أورفوار عليكي

الأستاذ said...

مواطن زهقان
يااه إنت فين يا عم؟؟
ألف شكر يا نجم على الرد الجميل وبراحتك روح إقرأ البوست تاني لكن المرة التانية بفلوس بقى .. لأ طبعاً براحتك
--------------------------------
خلود صلاح
هيمسكها هيمسكها مفيش خلاص من ده
لكن الفكرة إني هتعملي فيها متعرفنيش ؟؟
ماشي هي دي الصداقة البوجلرية؟؟

الأستاذ said...

desert cat
آه معاكي حق إلا لو رشح نفسه للرئاسة بعد كدة ونافس جيمي
ممكن ساعتها يطلع فتوى إن اللي ينافسه يبقى كافر
---------------------------
رينا
شكراً على الرد والصراحة معرفش موضوع الأجر ده لكن على ما أعتقد إن حسابه هيبقى مختلف تماماً عن أي حد في الكون
تحياتي

همسات ساكنه said...

انا قريت البوستين اللي فاتو
بجد عيش في مصر تسمع اغرب فتوى
يعني بتاعت جلد الصحافيين وقولنا حنعديها
كمان يقولوا ان الملك فارق من نسل الرسول عليه الصلاه والسلام حنقول الله اعلم بس مظنش يعني لان المسلسل عامله خلاف الشخصيه اللي عرفناها في التاريخ
موضوع التوريث ده بقى فيه كلام تاني
يمكن عمو جمال بيقول مش عايز حكم كلام يعني فض مجالس بس
لكن في النهايه حتكون انتخابات شبه اتحاد الطلاب ... تزكيه يعني
اما نشوف حيكملوا الفتاوي بايه
خلو بالكو من نفسكو بقى

الأستاذ said...

همسات ساكنة
شكراً على الزيارة الجميلة وأهلاً وسهلاً في المعتقل الافتراضي ده
ربنا يستر علينا كلنا
وانتظروا الجزء الثالث من الفتاوي
تحياتي

yomna said...

ابقوا صلحوا بلوجاتكم دي بقى مش معقول كده...انا كنت كتبت كومنت و مش عارف يا اخي ايه اللي حصل و معرفتش احطه...هاتلك كهربائي بقى يشوفلك زيت الفرامل اللي دخل على الدبرياج و بوظ الفوانيس ده

و اما بالنسبة لعمنا الكبير ده فا احنا لازم نراعيه برده... الراجل قاعد لا شغلة و لا مشغلة بقاله كتير فقال يحلل الكام مليون اللى بياخدهم كل سنة... ده غير انه عنده عيال عاوز يربيهم يعني مفيش مانع من كام فتوى من عينة الفتاوى دي اللي يحسن دخله بيهم و يعرف يجيبله سبوبة كويسة عشان يجوز محاسن و سنية... الراجل عاوز يخدم
بطلوا بقى حقد على الناس... و لو كان قاعد في حاله لا بيفتى و لا حاجة كنتوا قلتوا امال الفلوس اللي بيلهفها دي بيعمل بيها ايه...
ده انتوا عالم غريبة

YOTTA said...

يا أستاذ
انا خايفة عليك والله
من اللى بتكتبه ده
غالبا هتروح ورا الشمس
خلى بالك يا فندم
الحيطان ليها ودان
والمدونات ليها مراقبين
:)

الأستاذ said...

yomna
أنا اللي بحقد؟؟
ده أنا لذيذ ومسالم وبدعيلهم أهو
ليل نهار سراً وعلانية
على العموم بلاس حسن النية اللي إنتي فيه ده
تحياتي
-------------------------
yotta
وأنا كمان والله خايف عليكي مش علشان خايف تتاخدي بذنبي... لأ .. علشان إنتي هتخليكي برة المعتقل كدة متربصينلك لكن أنا عمال أترن علقة هناك عندهم واتجلد ويتعمل فيا العجب .. لكن مش هسمحلهم يبوظولي التسريحة
وإنتي عارفة إن اللي يسيب الناس تنعكش تسريحته ميستحقش يقف أدام المرايا
قريباً بوست
"كيف تعرف شخصيتك من تسريحة شعرك"
ده تنويع بقى
مع أطيب تمنياتي تزوريني ورا الشمس بقى .. وبلاش حجج هيجيلي ضربة شمس و شمس الزناتي والأفلام اللي عارفينها دي
تحياتي

osama said...

الله عليك يا استاذ ...
تحليل يمزج بين التهكم والسخرية من جهة وبين حالة العبث السياسي من جهة اخرى ..

اراك امسكت بتلابيب الخيط .. وانصحك باصدار كتاب تسميه ..
فتفتت الفتاوي للسيد اكاوي

دمتم بكل ود..
خالص تحياتي

الأستاذ said...

osama
شكراً لردك وبالنسبة للكتاب سيصدر قريباً
موسوعة الفتاوي للسيد أوكاوي
وسأناقش منه باقي الأجزاء
تحياتي

Meekness !!! said...

شسلام الله عليك

كله كوووووووم و الالوانات اللي في البوست كوم تاني
لا هايل يابني
و خطك حلو كمان
هههههه
المهم

يابني زي ما قالك السقا
اللي نعرفه احسن من اللي مكا نعرفوووش

و خاف على نفسك يا باشا

زيــزي

مدونة تحت العشرين said...

هذا و قد أفتي مفتي الديار المصرية بوجوب ذبح الأستاذ سمير فتحي أول أيام عيد الأضحي المبارك
مع كل من رؤساء التحرير الأربعة
و إن كل من تأخذة الشفقه سيطبق عليه حد الحرابا


عارف الصورة اللي قولت لك إنى هدخلها بالسكنار بس للأسف سي دي التعريف ضايعة و اللاب توب بتاعي اللى متعرف على السكانر مع زميل بابا بيعمل عليه شغل مهم
المهم الصورة عبارة عن صورة الريس وقف بيتكلم و قدامة ميكرفونات كتير
ميكرفون منهم عبارة عن رأس سيد بيه أوكيه


تحياتي لك

الأستاذ said...

meekness !!!
سلام الله عليكِ يا زيزي
شكراً على السؤال وحمداً لله على السلامة كويس إنك لسة فاكرة عنوان المدونة
آه الألوان دي مهمة أوي في كل مرة وعلى فكرة ليها دلالة لو متفهمش هبقى أحط الخريطة بتاعتها المرة الجاية على جنب كدة
خلي بالك إنتي , أنا مبخافش من حد غير ربنا
بس بيني وبينك ربنا يستر
تحياتي
-------------------------------
مدونة تحت العشرين
وقت الفتوى دي كانت إمتى بالظبط حضرتك؟ علشان بس أعمل عنها بوست وعلى فكرة "حرابة" بالتاء المربوطة
يا خسارة إن الصورة مشوتهاش
لكن بيني وبينك شكلها جامدة, يلا فرضة تانية
تحياتي

3abratalsabeel said...

سلام عليكم
ايوة يا استاذ ...جيت شفت الجزء التانى
وطبعا مش هقول راى لانى مش عايزة اتجلد

وبعدين المنطق بيقول ان اللاب لما بيموت الابن يورثه
خلااااااااااااص محيرين نفسنا ليه ؟
جمهورية ...ملكية ....ملوخية
كله ماشى والله ومش فارقة كتير

تصبح على خير
وبجد خد بالك من نفسك علشان لو اعتقلت المدونة ما حدش هيكتب فيها

سلام ...شكرا انك افتكرتنى

الأستاذ said...

3abratalsabeel
لا شكر على واجب طبعاً
ده كفاية إن حضرتك جيتي بنفسك وإنتي معدية في السبيل كدة دخلتي تعلقي
آه خلاص بقت ملوخية تقريباً بس مش لوحدها .. دي ملوخية بالشعب
علشان الحكومة تشبع
وربنا هو الحافظ إن شاء الله
تحياتي

أمانى وياسمين said...

السلام عليكم ورحمة الله وبركاته

عندك حق يا استاذ وكلامك كله صح والله بس ربنا يستر علينا وما نتاخدش في بوكس واحد ;d

لكن طبعا فتاوى السيد الاوكاوي بقت اخر جمال والله , يعني بجد انا بستحرم اقول كده على شيخ فاضل ورجل دين جليل لكن في حاجات ما تدخلش العقل وكل فتوى اغرب من اللي قبلها ربنا يعافينا ويطلعنا منها على خير

وميرسي لتعليق حضرتك في مدونتنا بجد شرف لينا والله

الأستاذ said...

أماني وياسمين
أهلاً بكم .. أهلاً بكم
شكراً إنكوا لسة على قيد الحياة وجيتوا علقتوا
شرف ليا أنا إنكوا تيكوا تنوروني طبعاً
تحياتي

عايش ولكن said...

عن موضوع الفول واللحمة صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول

الأستاذ said...

عايش ولكن
أيوة مع إحترامي لعم أحمد فؤاد نجم
ولحضرتك إنك عايش ولكن في الغيبوبة على رأي محمد صبحي
ده إيه علاقته بالموضوع بتاعنا؟؟
ياريتك حتى كنت إنت مؤلفها
بس على العموم مقبولة من حضرتك
أهلاً بيك في المدونة
وتحياتي

sarah la tulipe rose said...

:)
ما هو دةة لاسف لما العالم تغره الدنيا و يتناسي دينه و علمه من اجل التقرب المقزز للحكم
ربنا يستر بعد كدة مش عارفين حيطلع بايه بعد الجلد عشان يرضي سادة الحكم

sad_doraa said...

بما اني معلقتش على موضوعك الي فات لسوء الاحوال الدراسية الي كانت عندي من كام يوم
فانا ملاحظة ان المدونة دي تتسمى تحليل فتاوي -بكسر الياء- السيد اوكاوي
الله يرحم الدين اولا (الفتحة على روحه)
الله يرحم المصريين(85الف فتحة على روحهم)
خلاص مبقاش مبقاش
بحححح
انا ههج خلاص من البلد هروح اعيش برة لحسن ربنا يسألني اقولو كنت مستضعفة في الارض لا ارض الله واسعة ههاجر والي عايز يجي يلحقني المشكلة مبقتش مشكلة ريس ومن حوله المشكلة بقت مشكلة شعب عايز الحرق
انا اصلا مقهورة ومتغاظة وهنفجر فاي لحظة
بطل تحط الكبريت جمب النار بكرة نسيب البلد كلنا للريس يحكمها ولما يخلص تعمير واصلاح نبقى نجيلو لان كده بنضيع وقت
انا خاينة كده صح؟
ابقى خاينة لو قعدت فالبلد دي
اول طايرة طوكيو
سلاااااااااااام

fanan fa2eer said...

الله؟

أما أنتوا شعب ناكر للجميل صحيح؟
مش بتاكلوا وتشربوا وتناموا؟
عايزين ايه تاني من الذات الرئاسية؟

وبعدين هي مش عزبة أبوهم؟
مايورثوهاش لولادهم ليه ويقسموها ع الأهل والقرايب والخلان
والمنافقين أصحاب الفتاوي

الا انت صحيح مصدق حكاية الملك فاروق دي؟

أنا عن نفسي مش مصدقة انه كان ملك كويس ....عادي أهم بيضحكوا علينا زي عوايدهم

والله يابني الملكية بنظامها أحسن من اللي احنا فيه ده
علي الأقل الملكية هنبقي عارفين النظام ماشي ازاي وعارفين انهم هيستعبدونا علي أساس انهم مالكين البلد بقا

انما هما دلوقتي مستعبدينا واحنا مش عارفين نحدد بالظبط ايه وجه حقهم في كدة وعايشين وخلاص

فكرة حلوة حكاية ان تيم حسن يمسك الحكم والله

ياسلام هيمسك البلد ممثل حليوة كدة؟ بس هو ده مش سوري؟

ولا أمريكاني حتي هي يعني بتفرق معاهم هيطلعولنا تعديل في الدستور يسمح للسوريين بتولي المناصب الرئاسية في مصر

اسكت مش تكرموا علينا وزودوا مرتبات الدكاترة؟
100 جنيه بحالهم للأستاذ الجامعي

وايه؟ 45 جنيه بحالهم للنواب

هييييييييييييييه قدامي تلات أربع سنين بس وأقبض بالزيادة
الحمد لله

وان شاء الله بالـ 45 جنيه دول العيال اللي ماتوا وهما مسافرين ايطاليا هيرجعوا عشان ياخدوا الـ 45 جنيه أمال ايه


اسكت ياراجل اسكت خللي الواحد ساكت

الأستاذ said...

sarah la tulipe rose
آه م هو يعتبر من الحاشية فعلاً
وأكيد بعد الفتوى دي أوكاوي هيرشح نفسه للرئاسة واللي مش هيديله صوته هيبقى منافق
أهلاً بحضرتك في هذه المدونة المتواضعة وأتمنى تكرار الزيارة قريباً إن شاء الله
تحياتي
--------------------------------
sad_doraa
إهلاً .. كفارة
إيه الغيبة دي؟ كل ده بسبب الدراسة آه م أنا عارف ومجرب بس مش أوي كدة زيك
بس على العموم حمداً لله على السلامة وبراحتك خالص تنوريني طبعاً
إيه الخطبة دي كلها؟
شكلك مخنوقة فعلاً ومش منهم بس .. ده من الشعب كله كمان .. والله شكلك مخنوقة مني أنا كمان .. ربنا يستر
لأ دي مسمهاش خيانة إسمها هروب
لأنك لو روحتى أي بلد تانية حتى لو عربية هتتعاملي على إنك مصرية وده معناه إنك هتلاقي معاملة إنيل من هنا
مع أطيب تمنياتي بأن تعيش مصر حلوة وبتاعتنا
تحياتي

الأستاذ said...

fanan fa2eer
الله؟
إيه الاتهامات دي؟
أنا حاقد وناكر للجميل؟ مش لو كان فيه جميل أصلاً .. وبعدين دي الناس دلوقتي عاملة مظاهرات علشان تقدر تعيش مش علشان زيادات
وبعدين إيه ده ؟ إنتي هتبقي دكتورة إن شاء الله؟
طيب يلا ربنا معاكي ويوفقك إن شاء الله
تحياتي

بنت مصر said...

مش فاهمة ازاي جمي يقول معنديش النية ولا الرغبة ..كده من حق مصر تخاف على نفسها من الفتنه ...لكن بعد فتوي اوكاوي اكيد انسياقا لرأي الدين لازم تتواجد النية والرغبة
ده امر ربنا مش فاهمة

على فكرة في انتخابات الرئاسية اللي فاتت في ناس كانت بتقول بجد على سبيل الاقناع ان اللي نعرفه احسن من اللي منعرفوش ..وده بيسرق من زمان يعني اكيد شبع ..نجيب ليه واحد يسرقنا من الاول
والله الكلام ده بيتقال بجد مش هزار

اقولك حاجه مرة واحد حزب حاكم كان راكب جنب اخويا وعايز يميل دماغه وعمال يقوله ده انت هتبقى فخر لينا
ولما جات سيرة التوريث قام قايله جمال ده من بيت سياسي وكلنا نفسنا يكون الريس
ما الدكتور ابنه دكتور والمهندس ابنه مهندس

قام اخويا قاله اه الدكتور ابنه دكتور بس هو لو كويس هرحله لو لا مش هرحله مش فرض يعني
بس بعد كلام اوكاوي بقى فرض خلاص مش سنة

الأستاذ said...

بنت مصر
أوطى ناس بتوع الحزب دول اللي بيبقوا عايزين يقنعوا الناس وهما نفسهم مش مقتنعين أو على الأقل مضحوك عليهم أو حتى هما هبل مش فاهمين اللي فيها لأنهم في وسط النعيم لكن مش عارفين اللي برة في النار عامل إزاي؟
مع أطيب تمنياتي إننا مروحش للنعيم ده اللي يجي من ناحيتهم
تحياتي

coca said...

جيت متأخر اوي
بوكيه ورد كبير اهو علشان الاستاذ بس
(هات فلوسه بقي)
اللي عرفته انه اوكاوي مقلش كدا
مش عارفه بصراحه حقيقه الموضوع
بس انت اكيد ناوي كدا بدل ما نجيلك البلوج نجيلك بعيش وحلاوه

الأستاذ said...

coca
لأ والله قال كدة في أكتر من حتة بس كلها في الجرايد مش عارف في الحقيقة إيه؟
وبعدين اللي حصل برضه ساعة م راح اليوم السابع مع محمود سعد اتكلموا في كدة لكن أنا مشوفتش ده
وألف شكر على البوكيه واللي هدفع ثمنه أنا
تحياتي

abo salah said...

بعد السلام عليكم

ياخبر ابيض
جزء تانى .. وتالت كمان

لا بقى دا أنتا ناوى تعمليها سلسلة
لا بس الصراحة لما قريت تحليلك قعدت اضحك
طبعا من منطلق
أن شر البلية مايضحك

مااحنا اساسا جايين من كوكب تاني
وبعدين هى بلاد تركب الافيال عايزة ايه ؟
اكيد اي حاجة غير الافيال

يالا ياباشا .. خد بالك من نفسك
وبعد كده ياعم نزل بوست كل ساعة عشان نطمن انك ماحصلكش حاجة

تحياتي

الأستاذ said...

abo salah
يا مراحب
أهلاً بالمتأخر .. على العموم شكلك كنت جاي على فيل بطيئ شوية
المهم ربنا يسهل في موضوع بوست كل ساعة ده
شكراً على السؤال
تحياتي

Banota said...

fatawy el a2hawy .. post gamed awy 3ala fekra .. yalla montazreen el goza2 el talt ;).. w ma3lesh el com'ent et2a5ar showaya

doha said...

ربنا يستر عليك يابنى
انا لله وانا اليه راجعون

الأستاذ said...

banota
لأ ولا يهمك على التأخير
وشكراً على الرد مش زي المرة اللي فاتت وربنا يسهل في التالت إن شاء الله
----------------------------------
doha
أهلاً وسهلاً , أشكر زيارة حضرتك وأتمنى تكرارها
وربنا يستر علينا كلنا
تحياتي

وينكى said...

ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب

الأستاذ said...

وينكي
أهلاً وسهلاً بهذه الزيارة اللطيفة
وأرجو أن تتكرر مرحباً بحضرتك دائماً
واستغلي براحتك لكن لو هخلي الكومنت ده هنا هتدفعي كل إسبوع زيارة للبوستات الجديدة.. خلي بالك
مع أطيب تمنياتي إني أقدر أحضر اليوم ده إن شاء الله لأنها أول مرة في التجمعات البلوجرية دي الصراحة
تحياتي

l0ma said...

يا استاذ العدل بيقول ان الاعمال بالنيات وجيمى مش فى نيتو يمسك الحكم وطالما مش فى نيتوا يبقى عداة العيب وقزح
وبعدين انا عن نفسى برشح تيم للرياسة بما ان جيمى مالوش مزاج ومتكيف كدة وهو قاعد من تحت لتحت
وربنا يسترها ونلحق نهرب قبل ما يوظفوا الجلادين الجداد

الأستاذ said...

l0ma
آه معاكي حق الأعمال بالنيات فعلاً
أنا هرشح تيم معاكي
متقطعيش الزيارات بعد كدة
سلام

Che The Sad said...

الاستاذ
انا جاى مش علشان البوست الصراحة بس سمعت واحد بيقول حاجة ليها علاقة بالبوست بيقولك ان حسن حمدي بيطلب من جمال انه يتوسطله عند اوكاوي علشان يطلع فتوي ان كاس افريقيا من حق الاهلي

انا كنت عايزيك بقي تبص عنا وتشاركنا فى حملة ويكي بالعربي
http://cheeeeeez.blogspot.com/2007/11/blog-post_15.html

مستنى رأيك

تشي

الأستاذ said...

che the sad
براحتك يا عم متعلقش على البوست, كفاية زيارتك دي
أنا الصراحة مسمعتش عن الموضوع ده ومعرفش مين حسن حمدي لأني مليش في الكورة أوي الصراحة
وأنا هجيلك أهو
تحياتي

abo salah said...

بعد السلام عليكم

ازيك ياأستاذ عامل ايه؟
مش عوايدك الغيبة دي ؟
فين ياعم الجزء التالت

ويارب تكون بخير واحسن حال
ولو مشغول .. ربنا معاك

بس ابقي طمنا عليك

تحياتي
وسلاماتي

الأستاذ said...

abo salah
معلش يا أبو صلاح على التأخير والكسل ده
بس زي م تقول كدة بحضر وطالع عيني في الكلية ومحتاس جامد
لكن ربنا يسهل وأنزله بكرة بالكتير
شكراً على سؤالك
تحياتي

Che The Sad said...

استاذنا

البلوج بتاعى اتهاك عليه الجديد اهو
http://cheeeeez.blogspot.com/

تشي

abo salah said...

بعد السلام عليكم

الف سلامة عليك ياباشا
ربنا يقومك بالسلامة

وبعدين ايه حكايتك ياباشا مع البرد ده
هوه كل يومين ولا ايه
ابقي خد بالك من نفسك بقي

ان شاء الله هانتظرك بعد الشفاء لحسن كده في ميكروباص هيطلع من غير إمضاء الاستاذ

وابقي طمنا عليك

تحياتي
وتمنياتي ليك بالشفاء العاجل

متغيرة شوية said...

ههههههههههههههههههه

جامدين جدا الجزئين

مستنية التالت

coca said...

انت فين يا استاذ
طمنا عليك يارب تكون بخير
مستنيه بوستاتك الجديده بقالك كتير حارمنا من كلامك

mesh2dra said...

السلام عليكم

الف سلامة عليك يا أستاذ
البلوجات مضلمة من غيرك
في انتظارك

سلاماتي