الأجنة في بطون أمهاتها تهنئ الرئيس بالعيد "المبارك" مش عيد الفطر

دائماً تشاهد في القناة الأولى وخاصة في المناسبات أو غيرها أن جميع التهنئات تذهب إلى "الرئيس" بحكم أنه ممثل الدولة وبحكم أن مَن يهنئونه مِن القادة والزعماء ولكنك تجد بعض المبالغة أحياناً كالأمس وأنا أشاهد القناة الأولى في شريط الأخبار بالأسفل والذي هو مخصص للسيد الرئيس في المناسبات الرسمية وغير الرسمية:

"برقيات تهنئة من رؤساء وزعماء وقادة الدول العربية إلى الرئيس مبارك"

"مبارك يهنئ الأمة الإسلامية بالعيد الصغير"

"مبارك يتلقي برقيات من عدد من رؤساء الدول الأجانب"

وبعدما تنتهي وصلة البرقيات الدولية والعالمية تجد الأخبار المحلية .... "برقيات تهنئة إلى مبارك من أعضاء مجلسي الشعب والشورى وقادة الأحزاب والجيش والشرطة والقوات المسلحة وأعضاء النقابات والسلطات التشريعية والتنفيذية .... وما يستجد من سلطات"

لم يبق سوى أن يكون "الشعب" -لا سمح الله- يهنئ الرئيس ويتمنى له صحة جيدة وعيداً "مباركاً" و ليس عيد "فطر"

فهو دائماً يحب أن ينسب كل شئ له بدءاً من حرب 73 بضربته الجوية "القاضية" ( التي أطاحت بالعدو خارج حلبة مصر ورحب به في وسط الجولات كمشاهد للمباراة)

وانتهاءاً بالأعياد ومنهم الفطر والأضحى "المباركين" ثم تنتطر ما بعد هذه الجمل التي تحصر عدد البرقيات التي يتلقاها أو يبعثها الرئيس لتعرف منها ما هو قادم :

"جميع العائلات الكبرى والصغرى والمتوسطة وأهالي الأحياء والأموات وحتى الأجنة في بطون أمهاتها تتمنى للرئيس صحة جيدة ومعجزة إلهية تمكنه من الحكم -مدة أخرى- على حساب الشعب أو "تسليمها لأحد من العائلة المالكة" وتهنئه بالعيد المبارك"

أنا عارف إنه عيد وكل سنة وأنتم طيبين ومش وقته خالص الكلام ده والمفروض نقضيها "جانا العيد أهو جانا العيد" لكن "هو" مش "عاتق" قصدي مش عارف!

والأمر م يخلاش من السياسة حتى في العيد م هو أكيد "هو" كمان بيعيد برضه وبيدي ولاده "عيدية" -حتة من مصر كل عيد- تلاقيه راح سايب لـ "جمال" الأهرامات والنيل و"علاء" علشان مش في الصورة أوي يديله مثلاً البرج وأبو الهول علشان يحرسله حاجات أخوه و"أمهم" طول عمرها بتستهبل الشعب وتعلمه القراءة الغلط تحت إسم "القراءة للجميع" , وبدل م يكتبوا أسماؤهم ساعة الانتخابات يكتبوا "إسمه" طبعاً

ها حد خد باله بقى؟

------------------------------------------------------------

جزء نسيت أقوله:

ساعة إحتفال ليلة القدر على "القناة الأولى" برضه, تحس إنه فاتح القناة الأولى دي لحسابه - ناقص يطلعوا في الأخبار يقولوا (الرئيس اتعور و هو بيحلق دقنه) - , المهم ساعة الاحتفال كانوا بيتكلموا عادي ومرة واحدة قالوا حاجة في منتهى الاستفزاز بجد:

"وها هو الرئيس يشرف الاحتفال بليلة القدر" كأنه يشرف ليلة القدر نفسها , أنا الصراحة مش فاكراللفظ بالظبط علشان مقولش كلام "إفتراءاً" عليهم لكن أنا متأكد إنه استفذني ساعتها أكيد كانت حاجة مش سهلة , بس ليه يعني كدة ده على أساس إنه من الأولياء؟؟

وقال إيه عاملي فيها "شيخ" ورايح يصلي في "شرم الشيخ", علشان لما يسألوه صليت فين يا "مان"؟

يقولوهم في "شارم" .. وطبعاً شارم سمعتها سابقاها وتلاقي حتى الجوامع فيها على الشاطئ و"هيقضيها" بعدها علشان يتقال عليه رئيس "cool" .. آه م هو لسة شباب 26 سنة حكم بس ياعيني

أصل الرؤساء عمرهم بيتحسب بالحكم.. يعني لسة "الحكم" قصدي "العمر" أدامه طويل

أظن المرة دي كمان محدش خد باله, صح؟

------------------------------------------------------

تحديث لا بد منه:

من قليل ذهلت عندما رأيت وصلة إعلانات عن إنجازاته "العظيمة" لأ والمفاجئة برضه على "القناة الأولى" وإعلان عنه من أول م بقى رئيس لحد دلوقتي وإيه اللي عمله من خلال "ألبوم صور وفيديو" فينك يا "مصطفى كامل" طبعاً المغني

وبعدها "محمد نور وشيرين" بأغنيتهما المخجلة "بلدي" اللي ساعة حملة "العبور للمستقبل" (أنا فعلاً من قريب رحت "العبور" لكن عادي يعني لما خرجت منها م طلعتش على المستقبل ولا حاجة طلعت على الدائري) وتبدو كلمات الأغنية على لسان الرئيس شخصياً وأيضاً يبدو أنها من تأليف كاتب الخطب الخاص به , فما المغزى من هذا؟

هل ليعلم الشعب أنه أتى لهم بالعيد ثلاثة أيام كاملة ليفرح الشعب؟ أم ليحرق دم الشعب في تلك الثلاثة أيام؟؟

أم أنه إعلان رسمي بتولي "جمال" الحكم في ثاني أيام العيد وكأنه "حدث في مثل هذا اليوم" ؟؟

بأن الرئيس صنع كل ما في وسعه سيترك الحكم لابنه يخلفه ليوسع "النشاط" اللي إحنا عارفينه واللي هما محترفين فيه؟؟
المرة دي بقى أنا عايز الناس كلها تاخد بالها