Tuesday, October 23, 2007

فتوى السيد/ محمد سيد أوكاوي تتسبب في إتاحة فرص عمل جديدة

منذ يومين كنت "أتسكع" في المدونات كعادتي وبالصدفة وجدت موضوعاً غريباً لم أكن سمعت عنه من قبل -ليس لثقل في أذني- ولكن لقلة متابعتي للجرائد عامة وكان هذا في مدونة الأخت hanady تحت عنوان "إرحمنا من تصريحاتك" ولم أكن أعلم حينها بشأن هذا الموضوع الصادر عن هذه الظاهرة "الرئاسية" التي تستحق الدراسة والنقد
ومن الغريب أن تجد هذا الموضوع بعد السابق مباشرة ولكنني لا أناقض نفسي بين هذا وذاك .. إنها آرائي أعبر عنها ببساطة في كل ما يجري
أما عن هذا المقال فقد نشر في عدد (الدستور يوم 10 أكتوبر العدد الخاص بملف الملك فاروق) والذي استوقفني فيه "عدد 2 فتوى" شبيهة بالتي نحن بصددها الآن:
الأولى: تفيد بأن هناك فتوى صدرت بأن الملك فاروق من نسب النبي -صلى الله عليه وسلم- ... لا تعليق لأنني لا أعلم > في صفحة 6
الثانية: للإمام المراغي رحمه الله والذي كان أيضاً شيخ الأزهر سابقاً وكان قد طلب منه الملك فاروق أن يصدر فتواه بخصوص تحريم زواج الملكة فريدة طليقته ولكنه رفض ذلك .. "مش واخدلي بالك إنت" > وهذه في صفحة 8
أما الفتوى الثالثة "المثيرة للضحك" التي سأتحدث عنها من خلال رأيي الشخصي جداً والذي لم أكن متأثراً به لأنني كتبته قبل أن أقرأ هذا المقال > في صفحة 2
وجدير بالذكر أن "السيد أوكاوي" كان مفتي الديار المصرية في 1986 حتى تم تعيينه شيخاً للأزهر في 1996 ومن وقتها وهو"على هذا الحال" ولهذا لم أستغرب عندما يذهب أناس ويأتي غيرهم ويتم تبديلات جذرية و"لكنه لم يكن منهم"
مفاد هذا الموضوع:
(أن السيد/ محمد سيد أوكاوي قد أفتى مؤخراً بأن كل مَن يهاجم أو يروج الشائعات سيعاقب بـالجَلد 80 جلدة)
ولا أعلم تاريخ تلك الفتوى بالضبط وقت إعلانها ولكن قيل أنها كانت في احتفال ليلة القدر حينما "شرَّفه" الرئيس بالحضور ولكنني أرجح أنها بدأت في منتصف نومه ليلاً حينما فزع السيد "أوكاوي" على مكالمة هاتفية من "أعلى" لتهبط عليه بإصدار فتوى في هذا الشأن وإلا .. وقبل أن يكمل الصوت الأعلى كان السيد "أوكاوي" قد ضَمَرَ في نفسه فتوى جديدة بالفعل وأعلنها في الاحتفال...
وتأتي "أوكاوي" هذه من (OK) الفعل أي يوافق أو من مصدر الموافقة أو من إسم "الموافق دائماً" في هذه الحالة
نأتي لتحليل هذه الفتوى جزءاً بجزء واسمحوا لي أن أكون سئ الظن مع هذه الفئة وأفسر الموقف كما أراه -لست محللاً سياسياً أو فقيهاً- ولكنني سأستغل الفرصة لأنقده ولن أنتظر:
أولاً: يقول أن "كل من يروِّج" بمعنى آخر كل من "يتعرض" للرئيس -على بلاطة- لنكون في الصورة معاً كأنما يقول -"هعوره" ده وراه شيخ "أزهر" - أو شئ من هذا القبيل
ثانياً: سيُعاقب بـ "الجَـلـْـدْ" > الكلمة في حد ذاتها كفيلة بتداعي الأفكار الساخرة وهل نتعامل بالجلد مع حالات الزنا وقذف المحصنات نفسها .. لا .. لأننا ببساطة لا ننفذ الحدود الإسلامية في تلك الحالات ,فلِمَ الجلد هنا بالتحديد؟ وطالما أننا وصلنا لهذا الحد والذي ستُنفذ بالفعل معه تلك الفتوى رغم علمي أنها مجرد "زلة لسان" منه وكما قالها يوسف وهبي " كانت واخداه الجلالة" فلنستخدم إذاً إقامة الحد في قطع يد السارق "الأعظم" نفسه.
ثالثاً: وتكمن المشكلة هنا أننا لو افترضنا صحة الفتوى ومشروعية تنفيذها فنحن لا نملك .. جلادين ....!!
فهل سيتم الإعلان في "الصحف القومية" عن وجود وظائف "خيالية" أو "خالية" تحت بند "مطلوب جلادون" ؟؟
(مطلوب جلادون بشرط الخبرة 3 سنين ويفضل إجادة لغة أجنبية , مستعدون لجلد صحفيو المعارضة)
وعلى طريقة هذا الإعلان في حد ذاته من أين سيأتي من سيتقدم بهذه بالخبرة؟ هل سيقرأ في كتب التاريخ ليتعلم منها الجلد "على أصوله" ؟؟ ولم يسبق له مثل حديثي التخرج أن جرب تلك المهنة! .. أما اللغة فهي شئ آخر فهي لن تستخدم في الأساس ولكن ربما لأن تهذه هي "موضة" تلك الأعلانات ولكنها قد تُجدي نفعاً في هذه الحالة فأثناء الجلد لا بأس بقليل من "التوبيخ" على سبيل الـ "over time" باستخدام كلمات السباب الأجنبية الشهيرة والتي قد يصدر بها فتوى أخرى لاحقاً أنها ليست "حرام" لأنها ليس باللغة العربية بحكم أن "الجلادين" تابعون للأزهر و"مصلحة الجلد".
أو تكون الطريقة الأخرى للإعلان:
على "القناة الأولى" الراعي لتلك الأحداث من خلال سلسلة إعلانات أخرى لتوعية الشباب وحثهم على استغلال فرص العمل الجديدة تلك عن طريق ("دار الإفتاء" تعلن عن جاجتها لجلادين) أو سلسلة "قوم واشتغل" الشهيرة في ثوبها الجديد "قوم واجلد" وطبعاً سيكون الراتب مجزياً حقاً لأنه ثواب في الدنيا يشفع في الآخرة, وهذا غير الخير الذي سيأتي لمصانع الجلود التي ستتولى إنتاج "السياط" اللازمة للسادة الجلادين مما سيفتح باب رزق على العاملين في هذه المصانع ولا أعتقد أن أحداً سيرفضه من باب "عسى أن تكرهوا شيئاً ويجعل الله فيه خيراً كثيراً".
رابعاً: تحديد عدد "80" جَلدة مساوياً لعدد الجلدات في عقوبة قذف المُحصنات ومنها الإتهام بالزنا ,هل يرى الرئيس نفسه من "المُحصنات" ؟ أم أن صحته هي التي "مُحَصَّنة" والمفترض "محدش ليه دعوة بيها" ؟ وما الحجة التي ستُدرج تحتها تلك الفتوى في كتابه "الفتاوى الكاملة للسيد أوكاوي" هل تحت بند "الزنا بالكلمات" ؟ أم العيب في "الذات" الرئاسية؟
أياً ما كانت فهي ضمن نطاق الصحافة والتي أعتقد أن لها حرية "مسئولة" كما طالبنا بها رسامو الكاريكاتير عندما تم سب الرسول نفسه! فلماذا لم يُجلد الرسامون؟ هل لأن الرسول قد مات والرئيس مازال حياً ومن باب أولى أن " الحي أبقى من الميت" ؟؟؟؟؟
ورأيي الشخصي أن عدد "80" مرهق وكثير ولذا نرجو السيد "أوكاوي" أن يخاطب لنا "الرئيس" أن يخفف عدد الجلدات إلى "8" فقط حتى يستطيع "الإخوة الجلادون" من جلد أكبر أعدد ممكن في اليوم الواحد ولا يتكاسلون عن عملهم المقدس
ولتوضع تذكِرةً لهم لافتة :
(ويل للجلادين الذين هم عن المعارضين ساهون)
وأخيراً: أنتظر الفتوى الوشيكة التي تكفرني شخصياً وتعلن "زندقتي" , أو التي ستأتيني ممن يقرأ موضوعي هذا !
وبهذا نجمع أكبر عدد من الفتاوى في كتاب واحد
(إفتاءات شهر تشرين)

66 comments:

عابرة السبيل said...

سلام عليكم الاول بس علشان نبقى فى السليم
والتانى انى مش فاهمة يعنى ..انت مالك بالناس الحلوين دول؟
هو انت ناوى تعيب فى الرئاسة ولا حاجة؟
حلوة على فكرة حكاية اوكاوى دى
جديدة يعنى
الموضوع كبير على صغير على هايف على شكله هيودينا فى داهية
على شكله بوابة مصايب كبيرة
ولسه
سلام

كاميليا بهاء الدين said...

الى الآستاذ /آستاذ

ان مستغرب ان العقوبة 80 جلدة نفس عقوبة رمى المحصنات ليه؟ مش هو محصن برضو ويعتبر من المحصنين فى الآرض؟

ده محصن تحصينة لم يتحصنها اي حصان اقصد محصن خلق على وجه البسيطة.. خدها ببساطة بقى وسيب اوكاوى ياكل عيش ،، اصل الإفتاء دلوقت بقى آكل عيش
تطبيقاً لمبدآ - إصدر فتوى تاكل ملبن

مش كدة ولا ايه؟
كاميليا

كرياكو said...

استاذ
البوست مكتوب ببراعة وجميل اوى بس ليا ملحوظة صغيرة
فى طريقةالاعلان عن الجلادين
فى راى مش هتكون فى القنوات والجرايد المحلية بعكس هتكون فى الفضايات والصحف العالمية عشان لازم اللمهمة دى خبراء اجانب وهتكون تحت بند جلد 70 مليون مصرى

abo salah said...

بعد السلام عليكم

لا بقي .. أنا احجز اول تعليق

وبعد كده أقرا

أيوه ياعم تعويضا عن تأخيري علي بوستك اللي فات

ويالا بقي كأنه اعتذار مني ليك علي تأخري ياباشا

yomna said...

جرى ايه يا عم سمير انت مستغني عن روحك و لا ايه

خلاص ودعت العيال و قررت تستشتهد...ده انت لسه صغير يا عيني...مكنش يومك


اما بقى الشبخ اوكاوى ده فمنه لله...كل الناس عارفة انه منافق و بوشين و طول عمره بتاع الحكومة لكن توصل لحد الفتى في حاجة زى دي...انا قريت الخبر في الدستور و بجد ذهلت منه...لا و ايه مجمع البحوث الاسلامية راجع الفتوى و شاف انها صحيحة و ان مروج الاشاعات فعلا يستاهل الجلد... يا عالم يا------- و لا بلاش خلينا احسن منهم

يعني احنا ما شاء الله بنعدل الدستور عشان نبقى دولة مدنية و بنرمي بتوع اسلامية اسلامية في المعتقلات و فجأة رجعنا للحنين للدين و للفتي... يا سبحان الله بجد...طيب لو بتوع اسلامية دول كانوا طلعوا فتوى زي دي يا ترى كان الشيخ الاكبر اوكاوى هيقول ايه؟؟؟
طبعا طبعا كان هيدافع عن حرية الصحافة و الصحفيين

صدق اللي قال احترس مصر ترجع للخلف

Unknown said...

سلام عليكم
ازيك يا استاذ
بص هو الموضوع ينفرز موت
انا عن نفسي مش عارفة
ان كانت بجد الفتوي دي ولالا
لو بجد

تبقي حاجة تجن
هو بياخد الحلو اللي علي مزاجة ويسيب اللي مش علي مزاجة
هو بقي مفتي الديار الاول
بص احسن حاجة الصحفيين يسيبو الشغل بتاعهم ويشتغلو جلادين
بس ليا تعليق تاني
هبقي اقولك علية
سلام

abo salah said...

بعد السلام عليكم

بص ياأستاذ بعد ماقريت الموضوع
أنا بس هاتكلم في نقطتين

اولهما
صراحة أنا اول مرة اسمع عن الفتوي دي .. رغم اني شوية يعني متابع لجريدة الدستور بس مش علطول

بس لو الفتوي دي بجد .. وحصلت حقيقي يعني

يبقي مش هأقول غير
لا حول ولا قوة الا بالله

جلد .. ازاي يعني .. ازاي يصدر فتوي الان فيها جلد
سيبك من الدافع من اصدارها

بس احنا فعلا ولا بنقطع ايد السارق ولا بنرجم الزاني

يبقي ازاي جلد .. طب كان يقولوا حاجة مقنعة شوية

برضه أنا بصراحة مسمعتش عن الفتوي دي .. بس لو حقيقة
يبقي جمعت كل مصطلحات الغرابة


ثانيهما
هابعتهالك علي ايميلك احسن

تحياتي

simple girl.. ..simple dream said...

would u plz visit my blog and participate in my poll
i really need ur opinion


with my best regards

الأستاذ said...

3abratalsabeel
وعليكم السلام ورحمة الله وبركاته
مش عارف أنا ليه بتهم ناس أبرياء كدة بالكلام ده؟
لكن أهم حاجة أنا كسبتها زيارتك الجميلة على إطراءاتك المميزة على ملاحظاتك اللذيذة
لكن أهم حاجة تكرريها تاني
سلام
---------------------------------
كاميليا
آه م أنا فهمت أخيراً إنه من المحصنات أو المحصنين لو فيه أصلاً
آه م هي بقت مولد أي حد عايز يفتي يفتي
كدة طبعاً
سمير

الأستاذ said...

كرياكو
أشكرك يا سيد/ كرياكو على هذه الزيارة من اليونان الشقيق
وأشكرك على المجاملة
وأهلاً بك وبزيارتك وتعليقاتك ومتعلقاتك وكل ما تحب أن تجلب إلى المدونة
---------------------------
abo salah
ماشي يا أبو صلاح براحتك أنا كنت هستنى لكن إنت اللي مستنتش ولما جيب لقيت الرد التاني
شكراً

الأستاذ said...

yomna
والله ربنا يستر يا بتي
كلامك عجبني أوي أكتر م البوست عجبك يمكن .. ده لو عجبك أصلاً
ومعاكي حق خالص جداً أوي طبعاً في كلامك ده
انتبه مصر ترجع إلى القبر
تحياتي

الأستاذ said...

my hope$
فعلاً يا منى الكلام صحيح والفتوى صحيح إنها اتقالت لكن مش صحيح إنها المفروض كانت تطلع منه أصلاً
وكمان زي م قولت أنا معملتش البوست غير لما اتأكدت إن الخبر اتنشر في الدستور ده بعد م شوفت الموضوع في المدونة اللي قولتلكم عليها
شكراً لردك واهتمامك و"نصيحتك" وجزاك الله خيراً
--------------------------------
abo salah
زي م قولت لمنى الكلام صحيح فعلاً واتنشر لو عايزني أقابلك أوريلك الجرنال "أوك" ولا بلاش أوك ليقولوا إني بقلد ناس كدة
وثانياً جاتلي في رسالة وأنا هرد عليها أهو
شكراً ليك برضه

اسامة يس said...

هههههههههههههههههههههههههه
شر البلية ما يضحك فعلا...
فتوى بالجلد ... والله محد عايز يتجلد الا هوه
سيد اكاوي المنافق ...

جميل الموضوع وطريقة العرض
دمتم بكل ود..
خالص تحياتي

الأستاذ said...

osama
شكراً على ضحكتك دي اللي أعتز بيها جداً هي والزيارة الجميلة دي واللي أتمنى تتكرر
تحياتي

داليا عز said...


السلام عليكم جميعا

آسفة انى اتأخرت يا أستاذ معلش أعوضهالك البوست الجاى

بالنسبة للموضوع : لأنا مش شايفه أى حاجة غلط فيه !!؟؟

ايه ؟؟ وايه يعنى اما يفتى بان اللى يروج الشائعات يتجلد 80 ولا 90 ولا يجلد حتى الموت

عادى ..

طبعا انت مستغرب .. صح

اقوللك : من فترة سمعت ان الشيخ الأزعر .. كان فى أمريكا

ويا سلام بقى لما الشيخ الأزعر يروح أمريكا بتعمله ألف حساب

المهم : الشيخ الأزعر .. عمل مؤتمر صحفى

فواحد سأله سؤال محرج أوى

قاله : انتو يا قداسة الشيخ الأزعر عمالين تقولوا وحدة وطنية بين المسلمين والمسيحيين , ووطن واحد وشعب واحد وحقوق أقليات لما قرفتونا .. مع إن القرآن بيقول
( لقد كفر الذين قالوا إن الله ثالث ثلاثة )
يعنى القرآن بتاعكوا - على طريقة السائل - بيكفرنا .. امال فين الهولليلة دى ؟؟

قام رد عليه الشيخ الأزعر وقال : لأ دى مفاهيم خاطئة .. القرآن يقصد المسيحيين بتوع زمان !!!!

فيا أستاذ .. إذا كان الشيخ الأزعر بنفسه بيقول كده .. منتظر إيه يتقال ؟؟

وبرضة فى برنامج البيت بيتك .. اطلع برة

كان فيه واحد بيسأل الشيخ على دمعة مفتى الديار عن الملصقات الإسلامية على الجدران زى الأحاديث والآيات القرآنية والحاجت دى

قام رد الشيخ على دمعة وقال : طبعا حرام لأن ده تلويث للبيئة .. مع إن فيه مليارات الملصقات الإعلانية وانظر خلفك والكلام ده .. ليه الشيخ دمعة ماجابش سيرته يعنى

يا أخ أستاذ .. م الآخر .. فتاوى الأزهر بقت كوسة .. والواحد ماعادش يثق فى أى فتوى بعد الشيخ نصر فريد واصل والشيخ صقر ... وسلام

داليا عز said...


معلش يا أستاذ تعديل بسيط

الأزعر - على دمعة

آسفة قوى بس الكى بورد عندى مش بتكتب حرف الهاء والا حرف الجيم

شكرا

الأستاذ said...

داليا عز
أخيراً شرفتينا؟
الحمد لله حمداً لله على السلامة وكل سنة وانتي طيبة مش عارف ليه الصراحة لكن عادي يعني
المهم أنا الكلام اللي غنتي حكيتيه ده لم أسمعه حقيقة ولكن ليس تشكيكاً في مصادرك الحسية ولكن لأنني لا أتابع تقريباً أي شيئ
ولكني فعلاً حب على جمعة
آه أنا خدت بالي من موضوع الكيبورد ده معلش بقى أبقى أجيبلك واحدة جديدة أو نصلح الحرفين دول بالذات
أو أديلك كيبوردي لأنها سليمة أهي
"إنها سليمة"
وبتكتب الديم والزاء كمان
تحياتي

السقا said...

اولا الموضوع كبير اوي وانا لو مسكته ورديت عليه كلمة كلمة مش حا نخلص .
ثانيا انا ما كنتش اعرف ان موضة الفتاوى قديمة اوي كده .
ثالثا انا بتفق معاك طبعا في ان اقامة الحد مش مطبقة في بلدنا فياريت بلاش نفاق يا نعمل كل حاجة يا منعملش ولا حاجة مش يعملوا اللي ليهم بس .
رابعا انت ماتعرفش انه فعلا عملوا قسم جديد في كلية تربية رياضية بنين اسمه قسم الجلد واللي يتخرج منه يكون حاصل على باكليريوس في الجلد ووظائفه الحيوية . وانهم شالوا مادة حقوق الانسان اللي كانت بتبقى مكررة على اللي لسة داخلين كليات سواء نظرية او عملية وحطوا مكانها علم الجلد العام .
خامسا انت في الاخر استخدمت جملة الجملة دي اية وانت شلت كلام وحاطيته مكانه كلام تاني ياريت تشيلها علشان ماتحطش نفسك مكان القيل والقال وبرده علشان اللي يقراها ما يخدش ذنب .
أخيرا ياريت تبقى تشرفني في بلوج نفحات الحب انا لسة ما حططش فيه حاجة بس حا احط انشاء الله .

الأستاذ said...

السقا
أهلاً بيك في المدونة
وكمان أرجو موضوع مادة علم الجلد ده ميكونش صحيح لأنها هتبقى مشكلة للي هيدخلوا كلية تربية رياضية مش هيدخلوها بالمجموع هيدخلوها بعدد جلدات معين وربنا يستر
رداً على خامساً
أنا ممسحتش كلام وحطيت كلام ولا قصدك إني شيلت الآية وحطيت كلام تاني غلط إني أحطه
لأ أنا حاطط الجملة دي بكامل إرادتي واللي هي مش غلط الحمد لله وكمان أنا لو كنت هشيلها دلوقتي مكونش كتبتها من الأول ولو كان عقلي فكر يرجاعها ساعتها كنت هشيلها لكنها لها غرض ومفيش منها مشاكل ومعتقدش عقلي كان غايب ساعتها وعلشان محدش ياخد ذنبها محدش يقرأها ولا يحفظها أو يصلي بيها
شكراً

Che The Hermit said...

دا اول تعليق ليا هنا مع انى كنت على طول باجي بس مش عارف ليه مكنتش بعلق يمكن بس علشان كان مودى وحش ولا حاجة المهم

انت شاغل نفسك بيه ليه دا اصلا ما يستحقش الهالة الاعلامية المعمولة حواليه اهو انا بعتقد ان السيد اوكاى خد شتيمة ودعاوى عليه اكتر من حنفي نفسه :D

ياللا مش مهم يا رب بس البلد تنضف من امثالهم

تشي

الأستاذ said...

che the sad
أهلاً بزيارتك الل زي م انت قولت مش اول مرة
لكنك مكونتش بتحط تعليق ليه مش عارف أنا كمان
سواء مودي كان مش حلو
قصدي مودك
أو يمكن البوستات اللي فاتت مكانش ليها لازمة أكتر من ده لكن على الأقل ده علشان فيه كلام
الله أعلم
أنا طبعاً بهزر
بعد كدة يا تعدي وتعلق يا إما متعديش من غير متعلق أو متعلقش ده براحتك طبعاً ودي مدونتك

dr.Roufy said...

والله ..احنا بقينا بنتوقع اي حاجة من الحاج اوكاوي حفظه الله
تعرف..انا برضه أول ما سمعت بهذه الفتوى اللولبية
قلت ليييييه..هو الريس من المحصنات ولا ايه يا جدعان؟

هههههههههه
وبعدين لازم نعرف برضه ان شيخ الأزهر بتاعنا مصحصح قوي أهو
وبيطالب بتطبيق الشريعة..اسم الله عليه

بس تتطبق ..حسب الأوامر زي ما انت قلت

هاقول لك ايه بس
الواحد مفروس
الراجل دا ضيع هيبة الأزهر..فعلا
انا شفت له حوار بعد الأزمة دي على قناة العربية
تعرف فكرني بمين ..فكرني بالقاضي حلاوة الى كان في تمثيلية على الزيبق

كان بيتلعثم ..ومش عارف يقول جملة مفيدة تقريبا..وقعد يقول : هو مين دا الى يطالب بعزلي..أنا ماتعزلش من منصبي أبدا..والى مش عاجبة يبعت جواب للريس ويحط توقيعه..

يعني زي قولة ..على قلبكم لطولون
والشاطر فيكم بقى يبعت جواب للريس


بجد يمهل ولا يهمل

mesh2dra said...

السلام عليكم

حضرتك بتناقض نفسك جدا
ازاى يعني متحامل على مستر "اوكاى" وف نفس الوقت الراجل حب يخدم بلده
1- زى ما انت قلت توفير فرص عمل لشباب الخريجين وذوات الصحة ماهو الجلاد لازم يكون عنده صحة
2- مستر "اوكاى" شايف المشكلة اللي البلد فيها
زيادة سكانية رهيبة فهو حب يقدم خدمات جليلة للسلطات قصدي لبلده ويخلص من عدد كبير من الشعب
ما هو اصل كتير دلوقتي بقوا صحفيين
وكمان فيه منهم صحته متستحملش فممكن يموت من الجلد
واهو عصفورين بحجر
انت متعرفش ان الزيادة السكانية هى الحجة دلوقتي لاى مسئول
مستر "اوكاى" حب يعمل ف شعبه خير ويكشف المسئولين
ويلغي اى حجج ادامهم عشان الشعب يقدر يحاسسبهم

انا مكنتش متصورة ان الناس بقت بشعة كده
دي سياسة يا جماعة
والراجل زى ما قلت بيفكر لأدام

حاجة ف سرك
انا قررت اقدم السي في بتاعي عشان شغل الجلادين ده
اصله عاجبني اوى وحييجى منه استفادة
قلي ازاى
اولا بما انى صحفية واللي حيتجلدوا دول زملاء ليا
فأنا قررت اشتغل جلاده عشان اخفف الضربة شوية
وكمان بما انى حشتغل جلاده وانا صحفية
يعني من الجائز جدا انى اتجلد ف يوم من الايام
فانا حروح اشتغل جلاده عشان اتعرف على زملائي الجلادين والجلادات واضرب معاهم صحوبية وبالتالي ضربهم ليا حيكون بسيط

بوست عجبني اووووي

ومتبقاش مستغرب
المفروض من كتر الحاجات اللي بنسمعها وبنشوفها
نفقد القدرة على الاندهاش

**
شكرا لاهتمامك وسؤالك

سلاماتي

خلود صلاح said...

(مطلوب جلادون بشرط الخبرة 3 سنين ويفضل إجادة لغة أجنبية , مستعدون لجلد صحفيو المعارضة)
على فكرة فعلا شر البلية ما يضحك؟؟
بس قولى يا مسيو.. بما انك متابع تاريخ يعنى .. يمكن انا مش واخدة بالى ولا بتاع.. هو احنا من امتى يعنى كنا استخدمنا الشريعة الاسلامية فى اى أمر؟؟
لا حول ولا قوة الا بالله

خلود صلاح said...

اعزر تأخيرى انا بجد كنت مشغولة .. بس انت عارف بجد انى بحب اتابعك
وحلوة اوى اوكااااااااااااوى

Anonymous said...

انت بهدلت الراجل بس يستاهل اكتر من كده
فكرتنى بوضوع كان تايه عن دماغى الرسول اتسب واتبهدل ومحدش فيهم اتنحنح واول ما تخرج اشاعات وكلام كذب عن الريس الكل قام وشمر دراعاته وجاى يجامل اصله فرح

واحده من الناس said...

عليكي مني السلام يا أرض أجدادي

عادي خالص الفتوى يا جماعه
مستغربين ليه
ده أقل واجب؟؟
الراجل حاططنا تحت جزمته قصدي شايلنا على دماغه بقالو 26 سنه
مانطلعلوش فتوى مخصوصه يعني ونتوصى
ونعمله اللي ما يتعمل
بلاش السواد اللي في قلوبكو ده؟؟

ما علينا
المهم أسلوبك في الطرح مميز كالمعتاد

الأستاذ said...

dr.roufy
أشكرك لاستجابتك السريعة في الرد
لكن للأسف أنا مشوفتش على الزيبق علشان أقدر أحكم لكن فعلاً أقدر أحكم من خلال كلامك وانك شوفتيه علشان كدة أنا حاسس إن الدور كان على مقاسه جداً
شكراً لحضرتك
فعلاً يمهل ولا يهمل
----------------------------------
mesh2dra
آه م هو ده الغلط اللي أنا وقعت فيه إني ناقضت نفسي فعلاً أنا كمان هجرب أقدم السي في اللي فيه البوست ده وكام بوست تاني علشان يقولي لأ خلاص الجلادين اتحجزوا عايزين ناس تتجلد النهاردة بقى
وبعدين فكرة إن الواحد يضرب صحوبية معاهم دي جامدة أوي لكن خلي بالك لأن في هزار الأصحاب ده أحياناً هيبقى فيه "هزار جلادين" يعني بدل م ناس بتضرب بالقفا أو بالإيد أو كدة هتلاقي دول لو قولتيلهم حاجة تضحكهم هيجلدوكي جلدة كدة خفيفة تعبيراً على سعادتهم أو الهزار
شكراً لاستجابتك إنتي
تحياتي

الأستاذ said...

خلود صلاح
ربنا يخليكي ويكرمك يا ميس
والله أنا ماليش في تاريخ الشعوب أوي أد ماليا في جغرافيا الحكام
لكن هحاول أجاوبلك على سؤال إحنا إمتى حكمنا بالشريعة ولو كان إشاعات مش حقيقة
وبراجتك خالص على التأخير تيجي في أي وقت المهم تيجي على البوست الجاي
ربنا معاكي ويوفقك
تحياتي

الأستاذ said...

hend...hanady
أشكرك على زيارتك حضرتك جداً وأتمنى تتكرر كتير طالما إننا ممكن نعمل ديتو بوستاوي على وزن أوكاوي كدة
لولا إني شوفت الموضوع عندك مكنتش هعمله تقريباً
شكراً
------------------------------
أوشة
معلش بقى كنت متدايق ساعتها شوية وحظ الراجل إنها جات فيه
لكن هحاول أخف عليهم شوية لأن ال26 دول أكيد أكيد هيشفعولهم
وفيينك من زمان مش بتييجي
شكراً وتحياتي

shorouk said شروق سعيد said...

الراجل سيد بيه أوكيه ده دايماً فاضحنا
فاكر أيام الإهانة الدانمركية لما طلع يقول الرسول إنسان ميت
يوميها بتوع الخليج شتمونا شتايم
أنا قرأت عدد الدستور عن الملك فاروق و قرأت عدد يوم الإربع اللى هو أول إمبارح
لو عندك إفتح صفحة 19
في صورة معبرة جداً أول ما شوفتها قولت طنطاوي أهوه
حاول تشوف الصورة دي
و أنا إن شاء الله هخادها بالسكانر

الأستاذ said...

مدونة تحت العشرين
لأ الصراحة مجيبتش الدستور من فترة
لكن هحاول ألاقيه
لكن برضه هعتمد على "سكانرك" لما تدخلي الصورة
شكلها زي بتاعت عدد الملك فاروق لما كان "مستكن" ومتمسكن كدة وعامل فيها خاضع ورقبته لتحت زي م يكون باين عليه إنه "عبد المأمور" مش عبد ربنا
أو بالأدق عبد القائد الأعلى للقوات المسلحة نفسه
شكراً

Unknown said...

سلامو عليكوا
على فكرة يا باشا دة اول زيارة و اول تعليق ليا فى مدونتك الجامدة فعلا ما شاء الله
بس يا راجل انت مستغرب من ايه
ما هو هاتلى اى شيخ بتاع الازهر ممشاش ورا الحكومة ما كلهم تبعية لسعادة الحاكم بامره احنا على فكرة الدين مش بيتحكم فى السياسة لا العكس السياسة هى اللى بتتحكم فى الدين
thanx

الأستاذ said...

mido0o
على فكرة يا باشا براحتك دي مدونتك علق براحتك
وأهلاً بزيارتك الأولى واللي أتمنى متكونش الأخيرة وتتكرر إن شاء الله
تحياتي

3ala asm masr said...

انا قرأت الفتوى وكمان أتكلم عنها عمرو أديب فى برنامج القاهره اليوم
انا مش فاهمه اشمعنى دلوقتى اللى طلع فتوى بالجلد لمروجى الشائعات ما طول الوقت الشائعات موجوده
بس مش هنقول غير حسبى الله ونعم الوكيل
تحياتى

الأستاذ said...

3ala asm masr
فعلاً حسبي الله ونعم الوكيل
شكراً للزيارة وأتمنى تتكرر إن شاء الله
تحياتي

bastokka طهقانة said...

نقد لازع




اوروفوار

الأستاذ said...

bastokka طهقانة
مش واخد بالي الصراحة
على العموم ده رأيك وأحترمه طبعاً .. بس يمكن يرجع لأني مخي "لاذع" شوية وأكيد مش لازم كل الناس تتفق معايا لكن على الأقل تذكر الاختلاف بأكثر قليلاً مما قل و دل
شكراً لأن شكلك طهقتي مني أنا كمان
مع أطيب تمنياتي بإني مكونش شخصياً إنسان لاذع
تحياتي

Unknown said...

ايه يا عم الحقد ده مش عارفه الناس بقت وحشه كده ليه
الراجل اسم النبي حاصه و صاينه محصن و بعدين الاشاعات دي بتأثر علي نفسيته و علي ام العيال كمان نسيبه كده من غير حل
انت هاتشوف ربنا هايعمل فيك ايه بكره تطلع فتوه تعلقك من لسانك يا حقود يا ابو قلب اسود
يا عم هي جت علي طنطاوي ما الكل بيفتي

الأستاذ said...

emy
أشكر استجابتك
آه عندك حق فعلاً
دلوقتي الشعار بقى
"الفتوى في فم الجميع"
تحياتي

Unknown said...

حسبنا الله ونعم الوكيل في اوكاوي والواد بتاع وصلة النت

عشان بقالي ساعة باكتب في تعليق وفي الآخر النت يفصل

حسبنا الله ونعم الوكيل

بالنسبة لأوكاوي بقا أنا فكرت في فتوة أحسن

ما اللي يتكلم كلام مايعجبهمش يطلعوا فتوي بقطع لسانه عشان سب في الذات الرئاسية؟؟؟

ايه رأيك مش جامدة؟؟؟

وأروح أنا بقا أعمل دكتوراة في قطع اللسان وآجي أشتغل معاهم وهاكسب دهب من الموضوع ده ياسلام ياسلام

وهاستغل الفرصة وأقطع لسان الواد بتاع الوصلة ده بالمرة

ايه مش هابقي سيف العدالة؟؟؟

والله تبقي البلية لعبت معايا

وكان الفضل لأوكاوي

الا مش أوكاوي ده برده اللي فطرنا يوم في رمضان عشان غلط في الحسابات الفلكية؟؟؟

ولا كان واحد تاني

نهايته أهم كلهم زي بعض

واحنا في الآخر الكفرة والزناديق ونستاهل تمانين جلدة وهنخش النار حدف

حسبنا الله ونعم الوكيل

الأستاذ said...

fanan fa2eer
ياااه فيينك؟
على العموم معاكي حق وربنا يوفقك في دكتوراة قطع اللسان دي
تحياتي

nour el 3ozamaa said...

استاذي واستاذنا يا عم


80 دهلرمي المحصنا هو المنيل ده محصنات؟؟؟؟

هههههههههه عجبت لك يا زمن

تحياتى

Coca said...

الله انت مضايق ليه يا استاذ وحارق دمك اوكاوي بيوجب مع الريس يعني عادي
والريس بردو هيشوفوا "بلغه الصنايعيه"

الأستاذ said...

nourhetler
شكراً لزيارتك وأرجو تتكرر
آه م أنا كنت بقول برضه هو شايف نفسه من المحصنات ولا إيه؟
تحياتي
-------------------------------
coca
جيتي يا كوكا
طب كويس, م هو طالما أكاوي عمله شغل جامد تظييط يعني الريس هيشوه فعلاً زي م إنتي بتقولي إكراميات بقى وكدة مفيش رشاوي طبعاً لا سمح الله

ahmed mefrh said...

حلوة اوى تعبير محمد سيد اوكاوى ده
بصراحه انتا جبت التعبير الاقوى
شغال فعلا اوكيه فى كل حاجه
اول زياره ليا
تحياتى اليك
ابو مفراح

الأستاذ said...

أبو مفراح
شكراً لك جداً على الإطراءات دي
وعلى أول زيارة ليك واللي أتمنى متكونش الأخيرة
تحياتي

YOTTA said...

ههههه
أهو برضو هيوفروا فرص عمل لشباب كتير

وتروح تتقدم كده وكلك ثقة
ووالد العروسة يقولك بتشتغل ايه يابنى

جلاد ياعمى
...
والله اصلا حاجة غريبة
كل شويه الاقيه ف محطة او فى جريدة مرة ينفى اللى قاله ومرة يأكد
عم اوكاوى ده

ومبروك مدونتك غالبا هتتشمع قريب
ويمكن احنا كمان نتاخد ف الرجلين
بس احنا جامين اوى مبنخافش من حد

:)

Unknown said...

هههههههههههههه
يخرب عقلك انا برضه قريت الخبر ده فى الدستور
بقولك ايه
خليك فى الاوكيه
احسن ما يجى اوكاوى وانت عارف بقى
ربنا يستر عليك
اوكاوى يا عم
بس موضوع جامد وحلو جدا

الأستاذ said...

yotta
آه
جلاد ياعمي
وهتاخد كام في الشهر .. "زرة من الدنانير" ولو "أوفر تايم" يبقى عليها "سوط" هدية
إن شاء الله أنا هدافع عنكوا ويا إما تبقوا في صفي يا إما هجلدكوا
ربنا يجيب العواقب سليمة
-----------------------------
لماضة
ربنا يكرمك ويخليكي
شكراً على الزيارة الأولى ويارب متكونش الأخيرة علشان يبقى معايا أكبر عدد ممكن يدافعوا عني, وأتمنى تتكرر الزيارة الجميلة دي
تحياتي

Unknown said...

ايه يا عم الكسل ده فين الجديد

خلود صلاح said...

طيب انا جيت اهو .. وحشتنى كتاباتك .. فين البوست!.؟؟

الأستاذ said...

emy
لا والله مش كسل ولا حاجة أد م هو تميع للموضوع الجديد وإعادة صياغة لما في رأسي
وبيني وبينك فيه شوية كسل لأني مشغول حبتين
شكراً على سؤالك وإنتظري البوست الجديد قريباً جداً
تحياتي
---------------------------------
خلود صلاح
إيه يا إخواننا هو أنا اتأخرت أوي كدة؟
الناس كلها بتسأل فين البوست؟؟
هدور عليه وأجيبه من "عنوانه" إن شاء الله
شكراً للسؤال
تحياتي

أحمد said...

اعفيني يا أبو سمرة من الرد على البوست دا لأن أنت ما ترضاليش الشحتفة و الخنق و كفاية اللي بنسمعوا منو مش كمان هنعلق عليه

الملحوظ بس هو إنو لما كان المفتي كان بيفتي عشان هو المفتي و لما بقى شيخ الأزهر بقى هو اللي بيفتي عشان هو شيخ الأزهر ,واضح إن شغلة الفتي دي تخصصه ,بتاعتو يعني و على كل حال أنا دايما بقول إن الوحيد إلي الرئيس مش هيعرف يعوضوا لو حصاللو حاجة هو سيد طنطاوي لما يمثله من قيمة في الحكومة ,بتكلم جد مش بهزر

الأستاذ said...

الإنكشاري
لك ما تريد
إذهب "من هنا" بس ابقى تعالى البوست الجاي لو هينفع تعلق برضه زي التعليق ده تاني
على العموم شكراً برضه

ظل الشمس said...

والله يا سى الاستاذ الواحد مش عارف يقول ايه
هو فعلا اوكاوى
حاجة بقت تتعب القلب والله
عموما زى ما سامعتها مرة
نجلدهم لو اعزه الله يعتبر من المحصنات المؤمنات الغافلات
وحتى لو هو كده
نبقى الاول نقطع ايد السارق ونقتل القاتل
وساعتها متهيألى الاوكاوى هاينطبق نفسه هايبقى محتاج يطبق حد وسبت وتلات وجمعة كمان
وانتوا قارينى طبعا

الأستاذ said...

utopia
أهلاً وسهلاً بالزائرة الجديدة
والله كنت لسة بفكر في الأستاذ أحمد خالد توفيق
وانتظري الجزء الثاني غداً من "الفتاوي الكاملة" إن شاء الله
مع أطيب تمنياتي بإني ألحق أخلص ما وراء الطبيعة
تحياتي

NeRmeeN said...

السلام عليكم


ههههههههه احلى و اجدع سلام لفضيلة الشيخ اوكاوى

انت جاى على فتوى الجلد و مزعلاك...اومال قبل كده لما قال ان اللى مش هيروح الاستفاء اثم قلبه:س
رد انت بقى :ي

تحياتى ليك

الأستاذ said...

nermeen
أهلاً وسهلاً
فينك من زمان؟
حمدلله بسا.. بسالامة يعني
لأ م انا هنزله الكتاب بتاعه كله إن شاء الله إبقوا اطلعوا عليه بقى
تحياتي ليكي إنتي

. said...

الله يرحم الدين يا استاذي الله يرحمو
هما دول بقو اسيادنياوالعالم بيبكي مستني النهاية
بوستك على قد ماهو ساخر محزن اوي على حالنايا مسلمين
بجدبجد
تحياتي

الأستاذ said...

sad_doraa
أشكرك على كماتك التي أحزنتي أيضاً كما حدث مع من جراء ما كتبت وإني كنت لا أرجو هذا لأنني أتعمد السخرية أكثر من إفاقة رؤوسنا أو إثارة الحزن فينا
ولكن قد حدث ما حدث
ولكن الدين لم يمت وسيأتي الحق ولو بعد حين إن شاء الله

واحده من الناس said...

ربنا يهدي أولي الأمر
ويهدي علماء المسلمين اللي أصبحوا قله قليله يمكن الثوق فيهم وفي آرائهم بل وسلامة عقولهم قبل قلوبهم

الموضوع هايل وأسلوبك دمه خفيف

الأستاذ said...

بلا عنوان
حمد لله على السلامة
فين حضرتك؟
شكراً وربنا يكرمك
تحياتي

the others said...

مش عارفة ازاي مسمعتوش عن الفتوى دي ..دي كسرت الدنيا..ياجماعه فيه ايه كل اللي كتب كومنت هيجي عليه الدور خلوا بالكم احنا في مركب واحد كلنا بنكتب..ربنا يستر..بس الجلادين موجودين والله امال ضباط امل الدولة بيعملوا ايه بيفلوا الحاكم يعني لا بيفلوا الشعب واحد واحد يمكن يكون حد دماغه هارشهمه وبتكتب عنهم
خلي بالك
عجباني اوي اوكاوي يا نوواي من
no
يعني يا معارض ياوحش

الأستاذ said...

بنت مصر
أشكر زيارتك الجميلة
وأشكر على مجاملة النوواوية دي
وعاجبني أوي إنك تسيبي بصمتك دي
أتمنى تتكرر الزيارة دي
مع أطيب تمنياتي إن كل اللي بيعلوا هنا يكونوا في أمان
تحياتي

البيروني said...

ما شاء الله
انا قرات البوست و قلبت شوية في المدونة و حسيت اني امام فيلسوف و ليس استاذ
بس خلي بالك شوية من الفسلفة ممكن يود الواحد للخانكة
هههههههههههههههه