اتبعتلي تاج يا اخواننا

التاج الجميل ده بعتهولى الأخ العزيز أبو صلاح اللي بعتتهوله الأخت العزيزة الدكتورة روفي وانت كمان في حاجتين عايز أقولهملك يا أبو الصلح

أولا : أشكرك على ثقتك الغالية ، وعلى فكرة أنا مكنتش أعرف موضوع التاج ده

ثانيا : أعتذر عن تأخري أيضاً في الرد عليه بسبب انشغالى في أمور عائلية

لو قالولك اختار عصر من عصور مصرعلشان تعيش فيه تختار أى عصر و فى عهد أى حاكم .. واشمعنى؟

هأختار عصر الفاروق عمر بن الخطاب الذي سار علي نهج النبي وسنته وحكم بالقرآن وامتد حكمه في مصر وليبيا وحتى أذربيجان, أما إن كان السؤال يقتصر علي فترة مابعد الملكية فسأختار جمال عبد الناصر لأنني أري أنه فعلاً أحسنهم رغم العيوب والأخطاء ولكنه اهتم ونجح في قضية مهمة فعلاً وهي الوحدة التي أيدته ونجد أن باقي الدول وخصوصاً سوريا تحبه جداً لتطبيق مبدأ القومية العربية.

أول أولوية فى حياتك عيلتك ولا شغلك ولا أصحابك؟

عائلتي التي ستساندني في شغلي لأرتاح فيه وأصحابي الذين أفرج معهم عن همي.

إيه أكتر حاجة بتحبها فى رمضان؟

أكتر حاجة بحبها في رمضان .. إن الناس بتطلع أحسن ما عندها من مواقف جميلة وخير حتى وإن كان البعض يفعل هذا امتناناً أو رياءاً أو واجباً مفروضاً ولكنه يبقى شهر خيرات وطاعات ويقل فيه جانب الشر بصورة كبيرة وأيضاً كثيراً ما يكون السبب في هداية الضالين وزيادة ورع الطائعين.

اوصف ليا أجمل فطار ممكن تفطره!

لما يكون أكل أنا مشارك في إعداده أو معزوم عند حد بحبه وفعلاً بيجمعنا الفطار مع بعض بعد مدة ماشوفناش بعض.

لو انت حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم عادل؟

هنفذ ما يقوله "العدل" نفسه في كتابه العزيز وسنة رسوله الكريم , أكيد هغير حاجات كتير شايفها وحشة وأكيد في حاجات أوحش مش هشوفها زي م غيري مكانش شايفها أو عامل نفسه مش شايفها, وأتأكد من ده بإني أشوف ابتسامة طفل صغير يتيم كان مش لاقي أكل واتعلم وهينفع بلده أو شاب لقي شغل وسعيد وكله حماس يخدم بلده أو بنت اتجوزت اللي بتحبه و مراحتش عليها وهتطلع ذرية صالحة للمجتمع أو طبطبة من إيد شيخ أو حاج أد أبويا بيعدي الشارع بأمان و أهم حاجة دعوة أم بنية سليمة وقلب محب بالمغفرة والرحمة ومزيد من العدل.

اللى بيبوظ الحكام .. نفسهم؟ ولا الشعب؟ ولا الحاشية المقربة؟

الحكام هما أساس العملية كما أن العدل أساس الملك , وأكيد لو الحكام كويسين الحاشية هتبوظهم وهتملاهم من الفلوس اللي بياخدوها وسايبين الشعب جعان, والشعب برضه ساكت ومش فالح غير إنه يسمع أغاني وبس ويشجع كورة ويشتم في الاعب الموهوب اللي بيضيع فرصة ويشتمه بوصفه إنه محصلش أو ابن حرام لأنه لعيب فعلاً وناسيين كل حاجة لو الاتنين دول صح يبقى الشعب السبب ولو مش صح يبقى الشعب مشارك في السبب اللي مخليهم مش صح.

مين أكتر إعلامي مصري بتحترمه؟

إبراهيم عيسى بشنبه اللي مش بيحلقه ده.

قريت ديوان عمر مصطفى صاحب بلوج تجربه " أسباب وجيهه للفرح" عن دار ملامح و لا لسه ؟؟ لو آه إيه رأيك فيه؟؟
لأ الصراحة محصليش الشرف.

لو ممكن تشتغل شغلانة تانية غير اللى انت بتشتغلها أو كنت بتشتغلها كنت تتمنى تبقى إيه؟

كنت هتمنى أشتغل الأول وبعدين أتأمر وأغير الشغل لكن أكيد لو مش مخرج أو مؤلف أو ممثل حتى كنت هشتغل سياسي.

إيه تانى بلد تتمنى تعيش فيها بعد مصر؟

إيران, علشان أقابل أحمدي نجاد.

اوصف ليا ترتيبات أجمل فرح ممكن تحضره!

أجمل فرح ممكن أحضره يكون فيه جميع الأصدقاء والأقرباء والمدونين كلهم واللي معرفهمش كمان وأهم حاجة يغني فيه كاظم الساهر معرفش هينفع ولا لأ؟ ده إن شاء الله هيبقى فرحي لو ربنا إدانا عمر هيبقى أجمل فرح اتعمل وربنا يدي الصحة لكاظم و يقدر يغني ساعتها.

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

أكيد هقعد أهرش في ودني علشان عايز أتكلم في الموبايل وحاسس إن فيه حاجة ناقصاني, وبرضه هتضايق علشان مش هسمع كاظم على الكمبيوتر وأهم حاجة الكاميرا اللي هي أصلاً مش عندي دلوقتي هفتقدها كثيراً لأني مش هعرف أخرج أفلام, لأ بس هتعايش بس أهم حاجة إني هربي حمام زاجل علشان أقضي بيه حياتي وفعلاً هبقى فرحان بعدم التكلف وأركب على الحصان وأبقى فارس وأسافر بيه في أي حتة.

عندك أمل ؟؟ أسبابك ؟

أكيد ولازم , ومع زيادة اليأس بحاول ميضيعش إن شاء الله وأهم أمل في ربنا إني أدخل الجنة وفي الدنيا أبقى مخرج أصحح حاجات كتير في منظور الفن وأغير حاجات أكتر تفيد الناس وتبقى فعلاً فن وراقي , مش راقص.

امتى أول مره خدت فيها نفس طويل كده وقلت بينك وبين نفسك يااااه الظاهر أنا فعلاً كبرت؟

لما لقيتني داخل على عشرين سنة وأنا لسة مش حافظ القرآن كله ومعملتش حاجات مهمة وأنا طفل لأني كنت طفل ومش عارف إيع المهم أصلاً, ولما ألاقي ناس أكبر مني سناً وأصغر عقلاً من غير غرور بيعملوا حاجات أصغر مني وبتحصل مع الكل بقول أنا كبرت.

بتشرب سجاير؟ لو الإجابة آه إيه شعورك لو شفت ست بتشرب سجاير؟ وليه ؟

لأ .. الحمد لله بكره ريحتها وربنا يهدي كل اللي بيشربها,

ولما بشوف بنت أو ست بتشرب سجاير ببقى عايز أروح أضربها قلم يوقع السيجارة منها أو يجي على هدومها يحرقها طبعاً التصرف ده هي بتعمله في نفسها لما بتشرب سيجارة كأن راجل ضرب ست ودي حاجة المفروش متحصلش لأنها متستحملش, أو لما بتحرق في الرئة بالدخان بتاع القرف ده كأنها زبالة محروقة جواها.

بتعرف إيدك اليمين من الشمال إزاي؟

جديد عليا السؤال ده, لكن أنا بالذات في الأكل بحب لو فيه شوكة وسكينة تكون الشوكة في اليمين والسكينة في الشمال ده بيريحني أكتر من الإيتيكيت مش عايز خنقة وحد يقولي آكل إزاي مش بس علشان المفروض ناكل باليمين أو كدة.

إيه أكتر آلة موسيقية بتحبها ؟

الكمان, لأنها فيها كل الحزن اللي بيخليك تفرح في أي وقت لأنك بتسمعها و"كمان" كنت بعزف أورج زمان (جاية مع الوزن وليها أكتر من معنى فعلاً تستحق المحبة) وممكن برضه المندولين.

فى رأيك ليه الذوق والنخوه اتعدموا؟

علشان فيه ناس مش عارفة إن فيه ناس تانية لسة عندها نخوة فالمعظم بيتصرف تصرفات وقحة إلى حد ما محدش فارقة معاه لكن كله موجود الخير والشر ودايماً الخير بيكسب وهي دي السينما المصرية "زي م الأهلي بيكسب كدة" بس أنا مش أهلاوي ولا أي حد تاني.

إيه الحاجه اللى لو حصلتلك تبقى سعيد قوى؟؟؟

أول حاجة إن أشوف الرسول في رؤية , وبعدها إني أخرج أول فيلم محترم إن شاء الله, وأشوف مصر مصر بجد اللي ذكرت في القرآن , وتنتهي أمريكا وإسرائيل من الوجود بالموقعة المعروفة بـ "هرمجدون".

تختار يبقى عندك...أرض زراعية ولا أجنس عربيات و لا كام عمارة و لا فلوس فى البنك؟؟؟؟

الماديات عمري م بفكر فيها والله بجد لكن لازم الواحد يكون معاه يعرف يعيش ولو كدة يبقى أرض زراعية الواحد يقدر يموت فيها بمزاج.

البحر و لا النيل؟؟؟

.البحر غدار زي ما بيقولوا والنيل طويل زي م مش بيقولوا لكن ممكن النيل

مركب و لا طيارة؟؟

أنا بقى جربت الطيارة, لكني بحس إني بدوخ فمركب أحسن لكن إيدي هتوجعني طب م أنا في الطيارة مش أنا اللي سايق بس مش هقدر أركن الطيارة في النيل طبعاً فالمركب أحسن

مجنون و لا عاقل؟؟

بالنسبة للإخوة المجانين أكثر عقلانية وللعقلاء مجنون بعقل

تقرأ كتاب و لا تتفرج عليه فيلم؟

لأ اتفرج عليه فيلم لأني مش بحب القراءة أوي وبزهق منها بس ممكن أقرأ الكتاب بعد الفيلم لو عجبني أو لأ وكمان علشان أعرف مين اللي أخرجه وأشوف كنت هعمله أحسن ولا لأ

بتمرر التاج لمين؟؟؟

مش عارف هيفضل حد أصلاً لسة التاج موصلهوش ولا لأ؟ لكن ممكن بعض الناس اللي لسة بحاول أربط صلتي بيهم

أمرره لأي حد غير الناس اللي راحلها التاج أو حتى اللي راحلهم واللي نفسه في التاج ميغلاش عليه وسامحوني لو مبعتش لحد علشان مش عايز أجبر حد لكن إن شاء الله المرة الجاية (إجباري) ومفيش مفر
وكل سنة وأنتم طيبين